Հայաստանի Հանրապետության 2017թ. պետական բյուջեի նախագծով Մարդու իրավունքների պաշտպանի գրասենյակին նախատեսվում է հատկացնել 251 միլիոն դրամ: Ազգային ժողովում ՀՀ 2017թ. պետական բյուջեի նախագծի քննարկման ժամանակ այս մասին հայտնեց ՀՀ Մարդու իրավունքների պաշտպան Արման Թաթոյանը: «Մարդու իրավունքների պաշտպանի գրասենյակի հատկացումները 2016թ. համեմատ կրճատվել են 4.3 միլիոն դրամով»,- ասաց Արման Թաթոյանը:
Նա հավելեց, որ ՄԻՊ գրասենյակն առաջնահերթ ուղղություններ է որդեգրել՝ հաշվի առնելով նախկին գործունեությունը: 2016 թվականին սկզբում ՄԻՊ աշխատակազմում ստեղծվել են նոր բաժիններ՝ երեխաների իրավունքների պաշտպանության և զինծառայողների իրավունքների պաշտպանության բաժին. «Այս երկու լուծումներն արվել են առավել մասնագիտացված մոտեցում ցուցաբերելու համար»,-ասաց նա:
Արման Թաթոյանն անդրադարձավ նաև ՄԻՊ գրասենյակի առաջնահերթություններին 2017թ. համար: «Հաջորդ տարվա ընթացում առաջնահերթություն է լինելու բերման ենթարկված անձանց իրավունքների պաշտպանության հարցը, ՁՊՎ-ներում բժշկական ծառայությունների որակը, առանձին խմբերի իրավունքների պաշտպանությանն ուղղված նորմերը»,-ասաց նա:
Թաթոյանը նաև հայտնեց, որ այս տարվա հոկտեմբերի 31-ի դրությամբ գրասենյակ է ստացվել 4000 բողոք. ամենաշատ բողոքներն ուղղված են ոստիկանության համակարգի դեմ:
Լուսանկարը՝ Photolure-ի
