«Առաջին լրատվական»- ի զրուցակիցն է ՀՀԿ խմբակցության ղեկավար Վահրամ Բաղդասարյանը:
-Պարոն Բաղդասարյան, ՀՀԿ-ն այսօր քննարկեց կառավարության ծրագիրը վարչապետ Կարեն Կարապետյանի հետ: Հետաքրքիր է՝ սա Կարեն Կարապետյանի՞ ծրագիրն է, թե՞ ՀՀԿ-ի, և եթե այս ծրագիրը ձախողվի, դա կնշանակի՞ որ ՀՀԿ-ն ձախողվեց:
-Մենք հանդես ենք գալիս թիմով, վստահել ենք Կարեն Կարապետյանին և իր կառավարությանը, նա ներկայացրել է հիմնական դրույթները՝ իհարկե չշեղվելով ՀՀԿ-ի ծրագրային դրույթներից և ՀՀ նախագահի փետրվարի 12-ի ելույթի դրույթներից, մենք միասնական քննարկման են ենթարկել և եթե արդեն ՀՀԿ-ն տվել է իր համաձայնությունը, դա դառնում է միասնական ծրագիր:
-Պարոն Բաղդասարյան, սա կարճաժամկետ՝ վեցամսյա՞ ծրագիր է, թե՞ երկարաժամկետ:
-Շատ հետաքրքիր քայլ է կատարել վարչապետը: Նա երկու փուլով ներկայացնելու տարբերակ է ընտրել, վեցամսյա ծրագիր, և նաև հեռանկարային, հիմքերը, որ դրվում են, դա նաև թելադրում է շարունակություն ապագայում: Կտրուկ քայլերի մասին բոլոր կետերը, որ նշված են, դրանք վերաբերում են առաջիկա վեց ամիսներին, որոնք կունենան իրենց շարունակությունը:
–Ինչո՞վ է նոր կառավարության ծրագիրը տարբերվում նախորդ կառավարությունների ծրագրերից: Նախորդ կառավարություններն էլ հանրության սրտից բխող ծրագրեր էին ներկայացնում, բայց փորձը ցույց է տալիս, որ դրանք կյանքի չեն կոչվում:
-Ես դեռ չեմ ցանկանում մանրակրկիտ կետերին և դրույթներին անդրադառնալ, և՛ կառուցվածքային, և՛ մոտեցումների փոփոխություններ կան, բայց հիմնական տարբերությունը կտրուկ քայլերն են: Ես միշտ ասել եմ, որ կտրուկ քայլերը և կտրուկ փոփոխությունները կարող են բերել նաև բացասական երևույթի, այդ իսկ պատճառով ես որակել եմ, որ կան ռիսկային տարրեր, բայց այս ծրագրի իրականացման դեպքում, ինձ թվում է, որ բավականին արդյունավետ պետք է լինի, և ողջունում եմ Կարեն Կարապետյանի այս քայլը, որ ռիսկային քայլ է կատարել ու գնացել է այս կտրուկ քայլերին:
-Ո՞ր ոլորտներին են վերաբերում այդ ռիսկային քայլերը:
-Բոլոր ոլորտներին: Նախորդ կառավարությունների ժամանակ տեսնում էիք՝ գնում էր պայքար կոռուպցիայի դեմ և մյուս բոլոր խնդիրների լուծման հետ կապված, տեմպերը կային, բայց նաև նախորդ վարչապետն ինքը, նշեց, որ տեմպերից գոհ չեն, եթե տեմպերը դանդաղ են, հետագայում աստիճանաբար նոր պրոբլեմներ են առաջ գալիս և ձնագնդի նման կուտակվում են: Այս կառավարությունը որոշ ոլորտներում կտրուկ քայլեր է նշել կոնկրետ ժամկետներում: Ինձ թվում է, որ եթե ամբողջ թիմով բոլորս լծվենք, այս ծրագիրը կհաջողվի, և այս հաջողությունը բավականին հեռանկարային կլինի: Եկեք մանրամասն դեռ չվերլուծենք, որովհետև դեռ քննարկման փուլում է, մինչև վերջնական տարբերակը կհաստատվի:
-Պարոն Բաղդասարյան վաղը կդրվի՞ կառավարության նիստի օրակարգում:
-Այո՛, առավոտյան ծրագիրը կբաժանվի ԱԺ պատգամավորներին, կառավարության հետ համաձայնեցնելով՝ կա՛մ նոր արտահերթ նիստ գումարելով կքննարկենք, կա՛մ այս արտահերթ նստաշրջանում: Դրանք տեխնիկական խնդիրներ են, որը մենք կորոշենք ինչպես լուծել:
-Պարոն Բաղդասարյան ինչպե՞ս անցավ ՀՀԿ նիստն ընդհանուր առմամբ՝ հաշվի առնելով, որ այս նիստի ընթացքում ներկա էին նախկին վարչապետ Հովիկ Աբրահամյանը, կապի և տրանսպորտի նախկին նախարար Գագիկ Բեգլարյանը, և մամուլն արդեն գրել է, որ նրանք շատ բարձր տրամադրություն են ունեցել:
-Բայց ի՞նչ է պատահել, ինչո՞ւ եք դուք անընդհատ մատնանշում նախկին վարչապետին, Գագիկ Բեգլարյանին: Նիստն անցել է շատ կառուցողական քննարկման մթնոլորտում: Այնտեղ նաև եղել են աշխատանքից ազատված մարդիկ, եղել են նոր աշխատանքի նշանակված մարդիկ, և որևէ մեկը նման անդրադարձ չի կատարել: Մեր քննարկման թեման եղել է ծրագիրը և շատ բուռն քննարկում է ծավալվել:
-Մասնավորապես նշվել է այն մասին, որ Գագիկ Բեգլարյանն ուզում է նոր կուսակցություն հիմնել:
-Ես չեմ ուզում խոսել այն մասին, որ պարզապես հետաքրքրություն առաջացնելու համար ինչ-որ բաներ են գրում:
-Անհնա՞ր է ձեր թիմից նրանց դուրս գալը, պարոն Բաղդասարյան:
-Համենայնդեպս ես մեծ դժվարությամբ, բայց հարց տվեցի Գագիկ Բեգլարյանին և հարցի պատասխանը եղավ հումորով: Նա իր ուրույն տեղն ու դերն ունի ՀՀԿ-ում, նման տրամադրվածություն ես նույնիսկ մեկ անգամ չեմ զգացել:
-Այնուամենայնիվ նեղացած չե՞ն այս փոփոխությունների արդյունքում իրենց դուրս դնելու համար:
-Եթե մարդիկ 10-15 տարի շարունակ եղել են մեծ պաշտոնների, այդ ժամանակ նեղացա՞ծ էին որևէ մեկից կամ ինչի՞ց պետք է նեղանային: Կյանք է, ճակատագիր է, որը շարունակական գնում է, կարող է լինել հանգստյան խնդիր, կարող է վերադարձ էլ լինի, աշխատակազմի ղեկավար Արմեն Գևորգյանը գնաց հանգստացավ, առաջարկ ստացավ, նորից եկավ: Լավագույն աշխատողին քննարկումների արդյուքնում հնարավոր է խնդրենք ժամանակավորապես դադարեցնել կամ տեղափոխվել:
-Սեյրան Օհանյանի հետ կապված որոշում ունի՞ իշխանությունը:
-Սեյրան Օհանյանի հետ աշխատանքային փոխադարձ ջերմ հարաբերությունները պահպանվում են, և նա երևի մի փոքր հանգստանալուց հետո հայտարարությամբ հանդես կգա: Եղել են առաջարկներ տարբեր բնագավառներում: Սեյրան Օհանյանը բավականին շրջահայաց անձնավորություն է և նրա ուժերը կարելի է օգտագործել:
-Կառավարությունը արդեն ձևավորվել է, բայց շարունակվում է քննադատվել Մովսես Հակոբյանի նշանակումը:
-Նման փորձառու, պատերազմի թոհ ու բոհով անցած, մեծ փորձառություն ունեցող…
-Քառօրյա պատերազմի բացթողումների համար նրա հասցեին քննադատություններ են հնչում:
-Ո՞ւմ հասցեին քննադատություններ չկան, հաղթանակած բանակից սկսում են քննադատել և տարբեր պոստի մարդկանց քննադատում են մինչև գերագույն գլխավոր հրամանատար: Քննադատում են լրատվամիջոցները կամ այն մարդիկ, որոնց մտադրությունը մեկն է՝ ամեն ինչի գնով, մրոտելով հասնել իրեց նպատակներին:
Հարցազրույցն՝ ամբողջությամբ՝ տեսանյութում:
