Ջրային հաշվեկշռի համակարգման և վերահսկողության տնօրինությունը դատական հայց է ներկայացրել «Երևան Ջուր» ՓԲԸ-ի դեմ, որի հրահանգով լուծարվել է ՋՀՀՎ-ն, և շուրջ 40 հոգի ազատվել են աշխատանքից: Այսօր լրագրողների հետ հանդիպման ժամանակ ՋՀՀՎ տնօրինության ներկայացուցիչները հայտարարեցին, որ ամեն ինչ անելու են արդարության վերականգնման համար, վերականգնելու են իրենց աշխատատեղերը և խոչընդոտելու են «Երևան Ջուր» ՓԲԸ-ի կողմից իրականացվող ապօրինի գործողությունները:
Այս հարցերի վերաբերյալ զրուցեցինք «Երևան ջուր» ՓԲԸ-ի ՋՀՀՎ մասնագետ Տիգրան Հարությունյանի հետ.
– Ի սկզբանե ի՞նչ նպատակով էր ստեղծվել ՋՀՀՎ-ն:
– Նախ ասեմ, որ այս կառույցը ստեղծվել էր 3 տարի ժամկետով, և ի սկզբանե մեր ֆրանսիացի նախագահն ասում էր, որ այս կառույցի ստեղծումն անհրաժեշտություն է, և մեր նպատակը պիտի լինի համապատասխան միջացոռումների, ստուգումների միջոցով բարելավել Երևան քաղաքի ջրամատակարարման վիճակը, երևան հանել այս համակարգում եղած խնդիրները և փորձել գտնել դրանց լուծումները:
– Ամփոփ կներկայացնե՞ք՝ սկզբնական շրջանում ի՞նչ միջոցացումներ եք իրականացել, ի՞նչ խախտումներ եք արձանագրել, և ի՞նչ է ձեռնարկվել այդ ուղղությամբ:
– Մեր մեկ տարվա գործունեության արդյունքում 15,305 ակտ ենք կազմել: Մեր համապատասխան մասնագետներն այցելել են սպառողներին, ստուգումներ իրականացրել, որի արդյունքում ստացել ենք այս պատկերը։ Եվ սա այն դեպքում, երբ մենք ուսումնասիրել ենք ընդամենը Երևան քաղաքի մեկ քառորդը: Հետագայում պիտի ընդգրկեինք նաև մնացած տարածքները: Ասեմ, որ այս ակտերի հիման վրա շուրջ 166 միլիոն դրամ է գանձվել:
– Ի՞նչ պատճառաբանությամբ լուծարվեց ՋՀՀՎ-ն, եթե այն ամբողջությամբ իրականացնում էր իր գործառույթները և ստանում նախատեսված ցանկալի արդյունքը:
– Իրենք չէին պատկերացնում, որ մենք կարող ենք այսքան օպերատիվ աշխատել և, կոպիտ ասած, պատռել դիմակներ ու ցույց տալ «Վիոլա» ընկերության երևանյան գրասենյակի իրական պատկերը:
Ի միջի այլոց, սկզբում երբ մենք տեսանք, որ մեր ձեռնարկած գործողությունների արդյունքում բացահայտված ապօրինությունների վերացման ուղղությամբ գրեթե ոչինչ չի ձեռնարկվում,- իսկ մենք ջրի լուրջ կորուստներ էինք հայտնաբերել,- նամակով դիմեցինք նաև իրենց վերադասին՝ Ֆրանսիա, էլեկտրոնային փոստով ուղարկեցինք տվյալները և ասացինք, որ ձեր կառավարիչն այստեղ ոչ բարեխիղճ աշխատանք է կատարում, վատնում է ՀՀ բնական հարստությունը: Սրան հաջորդեց մեր էլեկտրոնային փոստերի անջատումը: Մեզ ասացին, որ ստրուկտուրային փոփոխություններ են լինելու։ Որոշումը կայացվեց մեկ օրվա մեջ, ուղարկվեց մեզ, և մենք այլևս ազատված ենք աշխատանքից, իսկ իրենք այլ աշխատանք էլ չունեն մեզ առաջարկելու:
– Պարոն Հարությունյան, այս գործով զբաղվող փաստաբանը նշեց, որ ֆրանսիացին իր երկրում կամ Եվրոպայում նման բան չէր համարձակվի անել, բայց այստեղ նման անօրինական գործունեություն է իրականացնում: Ըստ Ձեզ՝ ո՞րն է խնդիրը, գուցե նա այս ընթացքում հասցրել է յուրացնել հայկական մենթալիտետի, դատաիրավական համակարգի որոշ առանձնահատկություններ, և հետևել այն պաշտոնյաների օրինակին, որոնք ապօրինի գործունեություն են ծավալում ու մնում անպատասխան:
– Կարող է՝ նաև այդ պատճառով է: Այսինքն, ինչ-որ պետք է՝ այն է յուրացրել: Այն, ինչը կարող է խանգարել իրեն, իր կազմակերպությանը, առաջնորդվում է ֆրանսիական մենթալիտետով, իսկ ինչը կխանգարի գրպանին՝ արդեն հայկական մենթալիտետով:
