ԱՄՆ-ի և Հարավային Կորեայի ռազմածովային ուժերի զորավարժությունները, որոնք սկսվել են երկուշաբթի Invincible Spirit 2016 («Անհաղթ ոգի») ծածկանվան ներքո, առաջին անգամ կանցկացվեն Հարավային Կորեայի ողջ ափի շուրջ՝ Դեղին և Ճապոնական ծովերում, ինչպես նաև Չեջուդո հարավային կղզու մոտ։ Այս մասին հայտնում է «Ռենհապ» գործակալությունը։
Ուժի ներկայիս ցուցադրությունը, որը կոչված է վախեցնելու Հյուսիսային Կորեային նրա միջուկային և հրթիռային մշակումերի ֆոնին, կշարունակվի մինչև հոկտեմբերի 15-ը։ Դրանցում գործի կդրվի «Ռոնալդ Ռեյգան» ատոմային ավիակիրը։
Զորավարժություններն ուղղված են ծովում փոխգործակցության մակարդակի բարձրացմանը՝ հակառակորդի ուժերի զսպման գործողություններում։
Հարավային Կորեայի ազգային պաշտպանության նախարարության պաշտոնական ներկայացուցիչը հայտարարել է, որ Կորեայի Հանրապետությունը կարող է նախազգուշական հարված հասցնել Հյուսիսային Կորեային, եթե Փխենյանը նախապատրաստվի միջուկային մարտագլխիկով հրթիռի արձակման։
