Իրանական Tasnim լրատվական գործակալության փոխանցմամբ՝ Իրանի Իսլամական հեղափոխության պահակազորը հանդես է եկել զգուշացմամբ, որում Սաուդյան Արաբիայի ռազմանավերից պահանջվել է անցկացվող զորավարժությունների ժամանակ չմոտենալ Իրանի տարածքային ջրերին:
Մեկ օր առաջ Սաուդյան Արաբիայի ռազմածովային ուժերը սկսել են «Ծոցի վահան-1» մասշտաբային զորավարժությունները, որոնք անցկացվում են Պարսից ծոցում, Օմանոի ծովածոցում ու Հորմուզի նեղուցում:
Նավատորմի զորավարժությունները ղեկավարող Մաջիդ ալ-Կահտանին հայտարարել է, որ զորավարժություններն առնչվում են ռազմածովային գործողության բոլոր տեսակներին՝ ներառյալ ստորջրյա գործողությունները, ականների վերացման մշակումն ու էլեկտրոնային պատերազմը:
Իսլամական հեղափոխության պահակազորի տարածած հայտարարությունում նշված է. «Հայտարարված զորավարժություններին մասնակցող ռազմանավերից ոչ մեկը չպետք է մոտենա Իրանի տարածքային ջրերին և անգամ չպետք է անցնի Իրանի տարածքային ջրերի մոտ գտնվող միջազգային ջրերով»:
Պահակազորը կարծում է, որ զորավարժությունները կարող են մեծացնել լարվածությունը Պարսից ծոցում և թուլացնել անվտանգությունն այդ շրջանում: Իսլամական հեղափոխության պահակազորն ու Իրանի մյուս մարտական ստորաբաժանումները գտնվում են մարտական լիակատար պատրաստության մեջ՝ ապահովելու համար Պարսից ծոցի անվտանգությունը:
