ԱՄՆ-ի երեք նահանգների՝ Ֆլորիդայի, Ջորջիայի և Հյուսիսային Կարոլինայի տարածքում արտակարգ դրության ռեժիմ է սահմանվել «Էրմինա» փոթորկի մոտենալու պատճառով: Այս մասին ասված է նշված նահանգների նահանգապետերի պաշտոնական կայքերում հրապարակված հայտարարություններում՝ փոխանցում է TASS գործակալությունը։
Ֆլորիդայում, որը, Փոթորիկների դիտարկման ազգային կենտրոնի կանխատեսումների համաձայն, առաջինը կլինի «Էրմինայի» ճանապարհին, արտակարգ դրության ռեժիմ է սահմանվել 67 շրջաններից 51-ում: Դրանցում փակվել են պետական հիմնարկությունները, մի շարք վայրերում տարհանում է հայտարարված: Նահանգապետ Ռիկ Սքոթը կարգադրել է Ազգային գվարդիայի 6 հազար մարտիկների նախապատրաստել հնարավոր վնասը վերացնելու համար:
«Էրմինան» օգոստոսի 31-ին ձևավորվել է Մեքսիկական ծոցի ջրատարածքում՝ դառնալով Ատլանտիկայում ծովամրրիկների ընթացիկ տարեշրջանի ութերորդ արևադարձային փոթորիկը: Մոտավորապես մեկ օր անց մթնոլորտային երևույթը հասել է փոթորկի ուժգնության: Ներկայում դրա էպիկենտրոնում քամու արագությունը գերազանցում է ժամում 120 կիլոմետրը:
Փոթորիկը Ֆլորիդայի ծովափին մոտենում է ժամում մոտավորապես 20 կիլոմետր արագությամբ: Ինչպես սպասվում է, այն բնակելի շրջաններին կհասնի ուշ գիշերին։
