Թուրքական Son dakika լրատվական կայքի փոխանցմամբ՝ իշխող «Արդարություն և զարգացում» կուսակցությունը (ԱԶԿ) առաջարկել է 2019 թվականին չանցկացնել միանգամից 3 ընտրություն՝ ՏԻՄ, խորհրդարանական ու նախագահական:
Ավելի վաղ հաղորդվել էր, որ դա լինելու է Թուրքիայի Հանրապետության պատմության մեջ առաջին դեպքը, որ մեկ տարում անցկացվի միանգամից երեք ընտրություն:
ԱԶԿ-ն պատրաստվում է տվյալ հարցը բարձրացնել սահմանադրական հանձնաժողովի այսօրվա նիստում: Մասնավորապես, ԱԶԿ-ն առաջարկում է ՏԻՄ ընտրություններն անցկացնել 6 ամիս շուտ՝ 2018 թվականի հոկտեմբերին:
Նախագահական ընտրությունների հետ կապված՝ ԱԶԿ-ն առաջարկում է դրանք անցկացնել ծրագրված ժամկետից 3 ամիս անց՝ 2019 թվականի հոկտեմբերին:
Ինչ վերաբերում է խորհրդարանական ընտրություններին, ապա նախատեսվում է դրանք 2019 թվականի նոյեմբերի փոխարեն անցկացնել 2020 թվականի հոկտեմբերին: Այդպիսով, խորհրդարանական հաջորդ ընտրությունները տեղի կունենա ոչ թե 4, այլ 5 տարի անց:
ԱԶԿ-ն իր առաջարկները հիմնավորում է այն հանգամանքով, որ մեկ տարում 3 ընտրություն անցկացնելու դեպքում բյուջեն հավելյալ ծանրաբեռնվում է, ինչպես նաև նախընտրական արշավների համար անբարենպաստ կլիմայական պայմաններով: Մասնավորապես, ՏԻՄ ընտրությունները պետք է անցկացվեն 2019 թվականի գարնանը, իսկ դրա նախընտրական արշավը հարմար չէ անցկացնել ձմեռային ամիսներին:
