Բելառուսում Եվրասիական ու Մաքսային միություններին ՀՀ անդամակցության հարցը չի քննարկվել: Այսօր լրագրողների հետ հանդիպման ժամանակ ԱԺ փոխխոսնակ Էդուարդ Շարմազանովը, պատգամավորներ Մարտին Սարգսյանն ու Հովհաննես Մարգարյանը ներկայացրեցին Շարմազանովի գլխավորած պատվիրակության աշխատանքային այցը Մինսկ: Ինչպես տեղեկացրեց ԱԺ փոխխոսնակը, հայկական պատվիրակությունը Մինսկում մասնակցել է Հայաստանի և Բելառուսի Ազգային ժողովների միջև համագործակցության միջխորհրդարանական հանձնաժողովի 7-րդ նիստին, որի ընթացքում հայ խորհրդարանականները հանդես են եկել ելույթներով:
Ըստ բանախոսի՝ պատվիրակության կազմում են եղել «Հանրապետական» խմբակցության անդամ, Հայաստանի առևտրաարդյունաբերական պալատի նախագահ Մարտին Սարգսյանը, ՕԵԿ խմբակցության անդամ Հովհաննես Մարգարյանը, «Ժառանգություն» խմբակցության ղեկավար Ռուբիկ Հակոբյանը և Ինեսա Քոչարյանը: Շարմազանովն ասաց, որ հանդիպել են Բելառուսի ԱԺ Ներկայացուցիչների պալատի նախագահի հետ, այնուհետև՝ փոխխոսնակի հետ: «Բելառուսում իմ ելույթի ժամանակ անդրադարձել եմ ԼՂ հիմնահարցին, ընդգծել ենք, որ Ադրբեջանի սպառազինությունների մրացավազքն անընդունելի է և մարտահրավեր է տարածաշրջանային կայունության համար: Անդրադառնալով Հայաստան-Թուրքիա հարաբերություններին՝ Հայոց ցեղասպանության հարյուրերորդ տարելիցին, Երկրորդ աշխարհամարտի յոթանասունհինգերորդ տարելիցին՝ առաջարկեցինք, որ բանաձևի վրա սկսենք աշխատել, որտեղ լուրջ քննադատության կենթարկվի ռասիզմի, ֆաշիզմի ցանկացած երևույթ, և ասացինք, որ եթե դատապարտվեր Հայոց ցեղասպանությունը, տեղի չէր ունենա Հոլոքոստը»,- նշեց Էդուարդ Շարմազանովը:
Իր հերթին Մարտին Սարգսյանն ասաց, որ ձեռք բերվեց պայմանավորվածություն՝ ստեղծելու ենթահանձնաժողով, որը կաշխատի միջխորհրդարանական մակարդակներում, որի աշխատանքներում կներգրավվեն շահագրգիռ կազմակերպություններ: Ըստ նրա՝ կողմերը նպատակ են դրել ի հայտ բերել այն խնդիրները, որոնք առկա են երկկողամանի բիզնեսն առաջ տանելու հետ կապված: «Փաթեթներ կստեղծվեն, թե ինչ ենք ուզում իրենց ներկայացնել և սեպտեմբեր ամսին Բելառուսի առևտրաարդյունաբերական պալատի ներկայացուցիչներն այցելելու են ՀՀ, կմշակվեն այն ուղղությունները, որոնց շուրջ մեր հետագա գործընթացները կծավալվեն: Առևտրի տուն ստեղծելու ուղղությամբ ևս աշխատանքներ են տարվում, և Հայաստանում «Մոտո վելո» ընկերությունը ցուցահանդես վաճառք է կազմակերպելու, որը հնարավորություն կտա արտադրատեսականին վաճառել Հայաստանում»,- ասաց Մարտին Սարգսյանը:
Հովհաննես Մարգարյանը ևս խոսեց Մինսկ կատարած աշխատանքային այցից՝ ասելով, որ Բելառուսի հետ Հայաստանի հարաբերությունները խորացվում են ոչ միայն տնտեսական, քաղաքական, այլև ռազմաքաղաքական ոլորտում: «ՀԱՊԿ-ի շրջանակում բավականին սերտ համագործակցություն է շարունակվում»,- ասաց նա:
Հարցին, թե հանձնաժողովի նիստերի ընթացքում Հայաստանի՝ Եվրասիական միությանն ու Մաքսային միությանն անդրադարձ չի՞ եղել, նա պատասխանեց, որ ոչ, քանի որ օրակարգում քաղաքական համագործակցությունն էր և առևտրաարդյունաբերական հարաբերությունների խորացումը: Ըստ նրա՝ ՀՀ նախագահը ներկայացրել է ՀՀ դիրքորոշումը և այն, որ «և… և…»-ի կողմնակիցն է: «Մենք իրականացնում ենք քայլեր, որոնք մեր շահերից են բխում»,- ասաց Է. Շարմազանովը:
Լուսանկարը՝ PanARMENIAN Photo-ի
