Օգոստոսի 12-ին Գյումրու ավագանու որոշմամբ Պատվավոր քաղաքացու կոչում շնորհվեց նախագահ Սերժ Սարգսյանի եղբորը՝ Լևոն Սարգսյանին: Այս և առաջիկայում սպասվող ՏԻՄ ընտրությունների թեմայի շուրջ «Առաջին լրատվական» -ը զրուցեց Գյումրու ավագանու անդամ և Գյումրու Ժուռնալիստների «Ասպարեզ» ակումբի խորհրդի նախագահ Լևոն Բարսեղյանի հետ:
«Նախկինում այդպես հաճախակի չի եղել, հիմա տարեկան մոտ 15-20 հոգու Գյումրու Պատվավոր քաղաքացու կոչում տալու որոշում է կայացվում: Նախկինում էլ է եղել, որ անարժան մարդիկ ստացել են այդ կոչումը՝ Սերժ Սարգսյանը, Ռոբերտ Քոչարյանը, Գորիկ Հակոբյանը, էլի որոշ մարդկանց անուններ կարելի է նշել, բայց այս վերջին որոշմամբ համալրվում է այն քառյակը, որը ոչ մի կերպ արժանի է Գյումրու Պատվավոր քաղաքացու կոչումը կրելու»,- ասաց Լ. Բարսեղյանը:
Նրա հավաստմամբ՝ այս առաջարկով հանդես է եկել Գյումրու մանկավարժական ինստիտուտի նախկին ռեկտոր Վարդևան Գրիգորյանը՝ հիմնավորելով որ ինստիտուտին լաբորատոր սարքեր է նվիրել, նույն առաջարկով հանդես է եկել նաև Կոնսերվատորիայի Գյումրու մասնաճյուղի ղեկավար Կարինե Ավդալյանը:
Անդրադառնալով Գյումրիում ՏԻՄ ընտրություններին. Լ Բարսեղյանը նշեց. «Ընտրատեղամասերում նույնիսկ անհնար եմ համարում, որ որևէ բան կեղծվի: Կեղծիքներ ավելի շատ լինում են ընտրակաշառքի մեթոդով, որոշ դեպքերում դա զուգորդվում է կարուսելի մեթոդի հետ: Ընտրակաշառքը տներում բացահայտելը դժվար է, մանավանդ երբ իրավապահ համակարգ չունես, ունես սերժապահպան համակարգ և այդ համակարգը հակված չէ հանցագործությունները բացահայտելու. այս իմաստով անպատժելիություն է, սրա դեմն առնելը դժվար է»:
Մանրամասները՝ տեսանյութում:
