Իրականում Հայաստանում կա քաղաքական իրավիճակ: Իշխանությունները համարժեք չեն արձագանում Հայաստանում ստեղծված իրականությանը: Այս մասին «Առաջին լրատվական»- ի հետ զրույցում ասաց քաղաքագետ Աղասի Ենոքյանը:
«Սասնա ծռեր»-ին աջակցող նոր համակարգող խորհրդի վերաբերյալ քաղաքագետը նշեց, որ կարևոր է այն, որ կա քաղաքական խորհուրդ, որը պետք է ոչ միայն շարժումը համակարգի, այլ համակարգելու է նաև քաղաքականություն: «Ենթադրվում է, որ վաղը բավականաչափ լուրջ հանրահավաք կկազմակերպվի: Սակայն քաղաքական նոր խորհրդի անդամները փորձառու գործիչներ չեն, նոր են մտնում քաղաքականության մեջ, դժվար է գնահատել, թե նրանք որքանով կարող են շարժմանը քաղաքական բովանդակություն հաղորդել»:
Վարուժան Ավետիսյանը հայտարարել էր, որ իրենց «հարսանիքի փեսան» երիտասարդ է, և նրանք քանիցս արդեն բարձրաձայնում են, որ երիտասարդները պետք է առաջնորդեն այս շարժումը, և իրենց հույսը շարունակում են մնալ երիտասարդները, թեպետ վերջիններս չեն շտապում շարժաման առաջին գծում դուրս գալ պայքարի: Անդրադառնալով այս դիտարկմանը՝ քաղաքագետ Աղասի Ենոքյանն ընդգծեց, որ ինքը կարևորում է քաղաքական փորձառությունը նման լուրջ նախաձեռնության համար: Նրա խոսքով՝ «Սասնա ծռերին» աջակցող խորհրդը՝ այն գործիչները, որոնք վաղվա հանրահավաքն են քաղաքականապես համակարգելու, նրանք իրականում երիտասարդ չեն, քաղաքականության մեջ են երիտասարդ:
Ա. Ենոքյանի կարծիքով՝ քաղբանտարկյալների ազատ արձակումը դրական լիցք կհաղորդի այս ամեն ինչին, եթե նրանք մասնակցեն շարժմանը:
«Իհարկե, շատ կարևոր է հստակ քաղաքական ուղենիշը, թե ինչ ուղղությամբ է այսուհետ գնալու այս շարժումը: Ժիրայր Սէֆիլյանը իր ուղերձում նշել էր որոշակի ուղղվածություն՝ ապագաղութացում: «Սասնա ծռեր»-ը բոլորովին այլ գործողության ձև, ուրիշ մեթոդաբանություն են կիրառում, նույնիսկ անկանխատեսելիություն: Այսօր կարդացի մի միտք՝ «Սասնա ծռեր»- ի գործողությունները ցույց տվեցին, որ Ս. Սարգսյանի ասած «մեր դեմ խաղ չկան» այլևս չի աշխատում: Այո՛, այն մեթոդաբանությունը, որ մշակել էր իշխող վարչախումբը նաև ընդդիմության համար, այլևս կարող է չաշխատել: Նոր տեսակի պոռթկում եղավ, որը կարող է փոփոխություններ մտցնել: Կարծես թե ճիշտ են ըմբռնել, որ ներկա կոռումպացված, ոչ լեգիտիմ իշխանություններից ազատվելու ամենահեշտ ճանապարհը հենց ապագաղութացումն է, քանի որ այդ երկուսը խիստ միախառնված են»:
Մանրամասները՝ տեսանյութում:
