Տարածաշրջանային խնդիրներ, քաղաքական, դիվանագիտական և տնտեսական հարաբերություններ թեմայով ասուլիսին Գործատուների միության նախագահ Գագիկ Մակարյանը տեսակետ հայտնեց, որ Հայաստանում դիվանագիտությունը, տնտեսությունն ու քաղաքականությունը զուգորդված չեն, մինչդեռ երեք տարրերի համատեղ գործածումը առաջնային է:
«Եթե դիտարկենք Ռուսաստանի հետ Հայաստանի հարաբերությունները, կտեսնենք, որ հիմնական հարաբերությունները քաղաքական ու տնտեսական են, Վրաստանի հետ, օրինակ, տնտեսական հարաբերություններն ուժեղ չեն։ Այլ պետությունների պարագայում էլ նույնն է իրավիճակը, երեք տարրերի միաժամանակյա գործածում չկա»,- ասաց Գագիկ Մակարյանը:
Նրա դիտարկմամբ՝ վերջին հանդիպումներում, մասնավորապես, Սերժ Սարգսյան-Վլադիմիր Պուտին հանդիպման ժամանակ, դիվանագիտական երանգներ են նկատվել: «Պուտինն ասում էր, որ Մաքսային միության շրջանակներում Հայաստանի հետ հարաբերությունների առումով հաջողություններ են գրանցվել, որ 10 տոկոսից ավել տնտեսական աճ կա: Պուտինը, եթե ուշադրություն դարձնեք, ասաց, որ խոսքը Մաքսային միությանն անդամագրվելուց հետո ընկած ժամանակահատվածին է վերաբերում: Նա տարեթվեր չնշեց: Այսինքն՝ գումարվեցին բոլոր տարիները, ստացվեց 10 տոկոս: Դիվանագիտական երանգն այն էր, որ թիվը պայմանավորված էր Ռուսաստանի հետ հարաբերություններով, ոչ թե Մաքսային միությամբ: Հայաստանը, բացի Ռուսաստանից, ՄՄ շրջանակներում որևէ այլ տնտեսական գործընկեր չունի»,- նշեց Գագիկ Մակարյանը: -Ռուսաստանը, սակայն, սիրախաղի մեջ է Ադրբեջանի հետ, ուստի, ՄՄ դերը կարևորելով, Վլադիմիր Պուտինը ուղերձ է հղել պաշտոնական Բաքվին:
Գ. Մակարյանի խոսքով՝ Սերժ Սարգսյանը դիվանագիտական պատասխան տվեց: Նրա կարծիքով մարզիկների օրինակը, որը բերվեց նախագահի կողմից, պատահական չէր: «Նա ասում էր, թե ծագումով հայերը Ռուսաստանում կարևոր մեդալներ են բերում ՌԴ համար: Միշտ խոսվել է այն մասին, որ հայերը Ռուսաստանում աշխատում են, փող են ուղարկում Հայաստան ու օգուտ չեն տալիս ռուսական տնտեսությանը: Իսկ Սարգսյանն ուզեցավ ասել, որ՝ տեսեք, մեր՝ ծագումով հայ սպորտսմենները ձեզ համար ինչ հնարավորություններ են բացում: Ավելի կարևոր էր Սարգսյանի վերջին տողը՝ «առողջ մարմնում առողջ հոգի»»,- ասաց Գագիկ Մակարյանը՝ հավելելով, որ, իր կարծիքով, նախագահը նկատի ուներ Մաքսային միությունը: Երբ Պուտինն ակնարկում էր տնտեսական զարգացումների մասին, Սերժ Սարգսյանն այդկերպ հակադարձեց, որ մենք ակնկալում ենք առողջ Մաքսային միություն, որտեղ առողջ հոգի է պետք, առողջ մարմին, որն իրականում գոյություն չունի»,- ընդգծեց Գ. Մակարյանը:
Մանրամասները՝ տեսանյութում:
