Հուլիսյան իրադարձություններից հետո Հայաստանում ստեղծված ներքաղաքական իրավիճակի, Ղարաբաղյան հակամարտության հիմնախնդրի հետ կապված տարածաշրջանային զարգացումների շուրջ «Առաջին լրատվական»- ը զրուցեց ազատամարտիկ Մուշեղ Սաղաթելյանի հետ:
«Չի կարելի թույլ տալ, որ պայքարը դադարի, քանի դեռ պայքարում ենք, ինչ-որ մի ելք կա, և պայքարի արդյուքնում կծնվի ելքը: Իմ հույսն այսօրվա երիտասարդներն են, որոնց մեջ կան շատ լավերը, ովքեր ձգտում են ինքնիշխան Հայաստան ունենալ»,- նշեց ազատամարտիկը:
Նրա կարծիքով՝ «Սասնա ծռեր»- ը չհասան իրենց պահանջների կատարմանը, չհասան իրենց մտածած հաղթանակին, սակայն հասան դրանից ավելիին. «Տեսնում ենք, թե այս օրերին հասարակության մեջ, ինչպես է եփվում նրանց քայլը, որը վերջում ավելի գեղեցկացավ իրենց վերաբերմունքով, քանի որ նրանք ապացուցեցին որ իրենք չեն եկել արյուն թափելու, այլ եկել էին արթնացնելու, ոգևորելու հայ հասարակությանը: Նրանք պարտված չեն առ այսօր: Նրանք նոր Հայաստան ունենալու գաղափարի իրականացման համար են այս քայլը կատարել, և իրենց համախոհներն աստիճանաբար ավելի են շատանում»,- նշեց Մ. Սաղաթելյանը՝ հավելելով, որ «Սասնա ծռեր»- ը կպարտվեն, եթե անողնաշար իշխանությունն ազատ արձակի նրանց:
Ազատամարտիկի գնահատմամբ՝ Ս. Սարգսյանը երբևէ չի եղել նախագահ. «Ուրիշ բան է լինել Հայաստանի անկախ Հանրապեության նախագահ, ուրիշ բան է խլել այդ իշխանությունը և լինել այդ իշխանության ղեկավար: Որպես վասալի իրեն ճնշում էին, որ խոստացել է հողերը տալ, նա թույլ չինովնիկ է, չի կարողացել ասել՝ ոչ: «Ոչ» ասելու համար «Սասնա ծռեր»- ը նրա համար հնարավորություն ստեղծեցին, իհարկե, ոչ կանխամտածված: Ս. Սարգսյանը այս առիթն օգտագործեց, որ Ռուսաստանին ասի՝ Հայաստանում կա ներքին ընդվզում, չեմ կարող հողերը տալ:
«Եվ դրան հաջորդեցին Ռուսաստանի քայլերը: Ժիրինովսկին արտահայտեց մի միտք, որ Հայաստանը առանց Ռուսաստանի կոչնչանա, թուրքերը կոչնչացնեն. սա ահաբեկման ձև է,- կարծում է ազատամարտիկը,- հաջորդ քայլը Իրանի և Ադրբեջանի հետ պայմանագրերի կնքումն է, Ռուսաստանի պայամանագրերը կեղծ ու սուտ են և միշտ խափանվում են, սրանով էլ էին ուզում մեզ ահաբեկել, որ եթե չենք ենթարկվում, ապա Ադրբեջանի և Իրանի հետ կհամագործակցի: Սակայն եթե Ռուսաստանը քաղաքական խաղի մեջ չլինի, մեզ հետ ոչ մի երկիր չի պատերազմի»:
Հողերը հանձնելու հետ կապված մտավախությանն անդրադառնալով՝ Մ. Սաղաթելյանը նշեց, որ եթե փորձեն հանձնել տարածքները, ապա Հայաստանում քաղաքացիական կռիվ, կոտորած կլինի. «Օլիգարխներին ու իշխանություններին կհավաքեն մի տեղ ու լուրջ պատիժ կլինի: Դրանից ոչ ոք չի շահի, բայց կլինի: Հողերի հանձնումը այս իշխանությունների մահն է»:
Մանրամասները՝ տեսանյութում:
