Ադրբեջանին զենք վաճառելու ՌԴ-ի քայլը ռազմավարական գործընկերոջ պահվածք չէ: Այսօր լրագրողների հետ հանդիպման ժամանակ այս մասին ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը՝ անդրադառնալով Ռուսաստանի՝ Ադրբեջանին 1 մլրդ դոլար արժողությամբ հարձակողական բնույթի զենքի գործարքին:
Կիրո Մանոյանն ասաց, որ Ռուսաստանը իրավական առումով պայմանագրային տրամադրություններ չի խախտել: Բայց, նրա գնահատմամբ, Ադրբեջանին մեծածավալ զենքի վաճառքը ռազմավարական դաշնակցից ակնկալվող պահվածք չէ:
«Եթե հավատանք մեկնաբանություններին, թե այդ զենքը Հայաստանի և Ադրբեջանի միջև ռազմական հավասարակշռությունը չի խախտում, ապա, այդուհանդերձ, պատերազմի հավանականությունը մեծանում է, երբ նման պետության ձեռքին զենք է հայտնվում: Բնականաբար, պատերազմ սկսելու գայթակղությունն Ադրբեջանի մոտ մեծանում է:
Ուստի մտահոգիչ է ՌԴ-ի պահվածքը, որքան էլ որ փորձեն ներկայացնել, թե ռազմական հավասարակշռությունը երկրների միրջև չի խախտվում: Կան նաև այնպիսիք, որոնք ասում են, թե ոչ միայն խախտվում է հավասարակշռությունը, այլև վտանգվում է տարածաշրջանը: Դա առավել ևս մտահոգիչ է: Իրավական իմաստով խախտում չկա, բայց ռազմավարական դաշնակցից ակնկալվող կեցվածք չէ»,- մեկնաբանեց Կիրո Մանոյանը՝ հավելելով, որ ՌԴ-ի պահվածքն ընդունելի չէ:
Բանախոսի համոզմամբ՝ ՀՀ իշխանությունների արձագանքը ևս համարժեք չէր ՌԴ-ի այդ քայլին:
ՀՅԴ ներկայացուցիչն ասաց, որ ՌԴ-ն պետք է զգար, որ Հայաստանի ժողովուրդն ու իշխանությունները, քաղաքական ուժերը դժգոհ են այս պահվածքից:
«Եթե նույնիսկ հավասարակշռությունը չի խախտվում, պատերազմի հավանականությունը մեծանում է: ՌԴ-ն գնաց տնտեսական գործարքի՝ տարածաշրջանում իր ազդեցությունը պահելու համար»,- ասաց Կիրո Մանոյանը:
Լուսանկարը՝ PanARMENIAN Photo-ի
