Թուրքական Evrensel թերթի լրագրող Հազալ Օլմեզը, որը գտնվում է հղիության 6-րդ ամսում, Ստամբուլում արմատական իսլամիստների կողմից ծեծի է ենթարկվել այն բանի համար, որ փողոց է դուրս եկել բաց հագուստով: Այս մասին հայտնում է թուրքական «Հուրիեթ» թերթը:
Օլմեզը պատմել է, որ երբ վերադառնում էր աշխատանքից իր սովորական երթուղով, փարաջայով մի կին քաշել է իր մազերը` մեղադրելով իրեն այն բանում, որ բաց հագուստ է կրում և Ֆեթուլլահ Գյուլենի կողմնակից է հանդիսանում:
Նրա խոսքով`հարձակմանը մասնակցել են երկու կանայք և մեկ տղամարդ, ովքեր հայտարարել են, թե այսուհետև նա «պետք է հագնվի այնպես, ինչպես իրենք են ուզում»։
Երկու րոպե հետո մոտեցավ երկար մորուքով մեկ այլ տղամարդ և բացականչեց, որ այս շրջանում չորս մարդ կա, որոնց իրենք հետևում են, և հերթը կհասնի նաև նրանց:
«Հետո նա ոտքով հարվածեց կոճիս: Նրանք անցորդներին կոչ էին անում հարձակվել ինձ վրա և ցանկանում էին լինչի ենթարկել ինձ», -պատմել է տուժողը:
Օլմեզը հավելել է, որ իսլամիստների խումբը շարունակել է իրեն ծեծել անգամ այն բանից հետո, երբ ինքն ընկել է։ Իրեն փրկել է մի տարեց կին, որը հարձակվողներին համոզել է կանգ առնել:
Նրա խոսքով՝ ինքը չի կարողացել հասնել բժշկից տեղեկանք ստանալ իրեն հասցված վնասվածքների վերաբերյալ՝ չնայած բժիշկը խորհուրդ է տվել դիմել ոստիկանություն և խոսքով հաստատել, որ ծնվելիք երեխան կարող էր տուժել հարձակման ժամանակ:
