Հանրապետական կուսակցության համագումարի փակումը, որի ժամանակ ծրագրային ելույթով հանդես է եկել կուսակցությունից ԱՄՆ նախագահի թեկնածու Դոնալդ Թրամփը, հեռուստաէկրանների մոտ է հավաքել 2.2 միլիոնով ավելի հեռուստադիտողի, քան դեմոկրատների համագումարի փակումը, որի ժամանակ ելույթ է ունեցել նրանց թեկնածու Հիլարի Քլինթոնը: Այս մասին են վկայում Nielsen մարքեթինգային ընկերության տվյալները՝ փոխանցում է RIA Novosti-ն:
Համաձայն հրապարակված տվյալների՝ Քլինթոնի ծրագրային ելույթով դեմոկրատների համագումարի եզրափակիչ երեկոն դիտել է մոտ 30 միլիոն մարդ, իսկ հանրապետականների համագումարի փակումը, որը տեղի է ունեցել անցյալ շաբաթ, հեռուստաէկրանների մոտ է հավաքել 32.2 միլիոն մարդու:
Ընդ որում, սոցցանցերում ավելի ակտիվ են եղել դեմոկրատների համագումարը դիտողները: Հետազոտության հեղինակների տվյալներով՝ նրանք յուրաքանչյուր րոպեն մեկ ուղարկել են 23.4 հազար թվիթ, իսկ Թրամփի ելույթը դիտողները՝ ընդամենը մոտ 16 հազար թվիթ: