Եգիպտոսում լարված իրավիճակը վտանգավոր է նաև մեզ համար, քանի որ ամռան ամիսներին մեր քաղաքացիներից շատերն իրենց հանգիստն անցկացնում են հենց այս երկրում:
«Առաջին լրատվական»-ը հայաստանյան տուրիստական գործակալություններից փորձեց պարզել, թե այս օրերին արդյոք նվազե՞լ են չվերթները դեպի Եգիպտոս: Մեզ հետ զրույցում Traveling.am տուրիստական գործակալությունից փոխանցեցին, որ Եգիպտոսում լարված ներքին քաղաքական կյանքը չի ազդել զբոսաշրջիկների վրա, քանի որ հանգստյան վայրերը հեռու են լարված տարածքներից:
Tours.am-ից էլ մեզ փոխանցեցին, որ այժմ իրենք գրեթե չեն կազմակերպում տուր-ծառայություններ դեպի Եգիպտոս, որովհետև վտանգավոր է չվերթներ իրականացնելը: Բացի այդ, պակասել է նաև տուրիստական գործակալություններին դիմողների թիվը: Մի քանի այլ գործակալություններ ևս համաձայնեցին այս տեսակետի հետ և նշեցին, որ եթե Եգիպտոսում շարունակի լարված մթնոլորտը, ընդհանրապես կարգելվեն չվերթները դեպի այդ երկիր։ «Մենք պատասխանատվություն չենք կրում զբոսաշրջիկների համար, ուղղակի տեղափոխում ենք նրանց, սակայն եթե վիճակը շարունակի լարված մնալ, դժվար թե կարողանանք մարդկանց տեղափոխել»,- ասացին Tours.am-ում:
Tours.am-ից մեզ տեղեկացրին նաև, որ եթե Եգիպտոսում վիճակը հանդարտվի, հնարավոր է՝ տոմսերը թանկանան, քանի որ օգոստոսին Եգիպտոսը նշում է Ռամադանը: