Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ընթանում է Տարոնուհի Ավետիսյանի գործի դատավարությունը:
38-ամյա Տարոնուհուն մեղադրանք է առաջադրվել երկու դրվագով կատարված հանցավոր արարքի համար:
Երկու դեպքում էլ տուժողը նույնն է՝ Տարոնուհու եղբայրը: Եվ եթե առաջին հանցադրվագի կատարումից հետո այն ի հայտ բերվեր, դրդապատճառն ու մեղավորը բացահայտվեին, երկրորդ՝ արդեն անուղղելի դրվագը չէր արձանագրվի:
Ըստ մեղադրանքի՝ 2012 թվականի սեպտեմբերի 12-ին, ժամը 16-ի սահմաններում Տարոնուհին Վանաձոր քաղաքի իրենց բնակարանում ծագած կենցաղային վիճաբանության ժամանակ դանակով երկու հարված է հասցրել եղբոր կրծքավանդակի շրջանին և նրա առողջությանը պատճառել ծանր վնաս:
Ճակատագրական մյուս վիճաբանությունը նույն բնակարանում տեղի է ունեցել երկու ամիս անց՝ նոյեմբերի 18-ին, ժամը 21-ի սահմաններում: Այս անգամ, առաջադրված մեղադրանքի համաձայն, Տարոնուհին կյանքից զրկելու դիտավորությամբ է դանակի մի քանի հարված հասցրել եղբորը: Տուժողը տեղում մահացել է:
Տարոնուհի Ավետիսյանին մեղադրանք է առաջադրվել ինչպես դիտավորությամբ եղբոր առողջությանը ծանր վնաս հասցնելու, այնպես էլ եղբորը դիտավորյալ սպանելու համար՝ ՀՀ քրեական օրենսգրքի 112 հոդվածի 1-ին և 104 հոդվածի 1-ին մասերով:
Տարոնուհի Ավետիսյանի նկատմամբ խափանման միջոց է ընտրվել կալանքը:
Քրեական գործը դատական քննության է նշանակվել 2013 թվականի ապրիլի 23-ին:
