«Հայաստանում ժողովրդավարական հիմքերի ամրապնդումը անհրաժեշտ է նախևառաջ հայ ժողովրդին ու Հայաստանի Հանրապետությանը և բխում է մեր շահերից՝ որպես բարեկեցության և սեփական անվտանգության ապահովման ամենակայուն երաշխիքի, ուստի շանտաժի մասին խոսք լինել չի կարող»,- «Առաջին լրատվական»-ի հետ զրույցում ասաց ԱԺ ՀՀԿ խմբակցության պատգամավոր Սամվել Ֆարմանյանը՝ անդրադառնալով Ընտրական օրենսգրքում փոփոխությունների համար անհրաժեշտ գումարի ներդրմանը:
Ուստի պատգամավորը կարծում է, որ անհրաժեշտ գումարը գտնելը մեր գործն է, թեև Հայաստանն ունի գործընկերներ, որոնք շահագրգռված են և տևական աջակցություն են ցուցաբերել Հայաստանին, ուստիև կարելի է ակնկալել նաև նրանց աջակցությունը:
Սամվել Ֆարմանյանը աննախադեպ համարելով և մեծապես կարևորելով ԸՕ-ի շուրջ ընդդիմության և իշխանությունների միջև համաձայնության կայացումը՝ այնուամենայնիվ, համարում է, որ նույնիսկ դա չի երաշխավորում ընտրական գործընթացների այնպիսի անցկացում, որ հասարակության աչքում լեգիտիմություն հաղորդի այդ ընտրությունների արդյունքների հանդեպ. «Մեր ժողովրդավարական գործընթացների զարգացման համար անհրաժեշտ է, որ կա՛մ իշխանությունը խաղաղ ճանապարհով, ընտրական գործընթացների արդյունքում փոխանցվի մի քաղաքական ուժից մյուսին, կա՛մ, որ պարտություն կրող ընդդիմությունը ընդունի սեփական պարտությունը»:
Ուստի Սամվել Ֆարմանյանը որքան կարևորում է ԸՕ-ի հարցում տեխնիկական խնդիրների ներմուծումը, նույնքան կարևորում է քաղաքական կամքի դրսևորումը, որի դեպքում «իշխանությունը պահելու խնդիրը չի դիտվի որպես գերխնդիր»:
Նրա խոսքով՝ գերխնդիրն այն է, թե ինչ պետք է արվի, որպեսզի ընտրությունների նկատմամբ հասարակության վստահությունը բարձրանա. «Եթե քաղաքական այդքան ուժեր կարծում են, որ սա այն ճանապարհն է, որը կվերացնի ընտրությունների արդյունքների կամ գործընթացի նկատմամբ հասարակության անվստահությունը, ես կարծում եմ, որ պետական բյուջեից կարելի էր դնել ոչ թե 4, այլ 40 մլն դոլար, որի ավելացված արժեքը շատ ավելին կարող է լինել Հայաստանի ապագայի տեսանկյունից»:
Մանրամասները՝ տեսանյութում:
