2003 թվականից ԱՄՆ-ի թմրանյութերի դեմ պայքարի գերատեսչությունը ձերբակալել է շուրջ 1000 մարդու, որոնք համաձայնել են իրավապահ մարմինների գործակալների առաջարկին` «թալանել» թմրանյութերի գոյություն չունեցող պահեստը: Ինչպես հաղորդում է USA Today-ը, 600 մարդ այս կերպ հայտնվել է դատարանում:
Պարբերականը նշում է, որ ալկոհոլային խմիչքների, ծխախոտի, հրազենային զենքի, պայթուցիկների շրջանառության վերահսկման վարչությունը (ATF) վերջին տարիներին կենտրոնացել է ոչ թե արդեն կատարված հանցագործությունների հետաքննության, այլ պոտենցիալ հանցագործներին ձերբակալելու վրա:
Միայն 2012թ. գործակալների թիրախում հայտնվել է 208 մարդ: Ոստիկանության կողմից ձերբակալված մարդկանց 13%-ը նախկինում օրենքի հետ լուրջ խնդիրներ չեն ունեցել:
Պարբերականը բերում է 32-ամյա Ալեքսանդր անունով տղամարդու օրինակը, որը կիսատ է թողել քոլեջի իր ուսումը և սկսել է թմրանյութ վաճառել: Ալեքսանդրը ձերբակալվել է մի քանի անգամ, սակայն ամեն անգամ մանր խախտումների համար: Ոստիկանության գործակալը, ներկայանալով որպես նարկոդիլեր, առաջարկում է նրան թալանել գոյություն չունեցող թմրանյութի խոշոր խմբաքանակ` վերացնելով զինված անվտանգության աշխատակիցներին: Ալեքսանդրը համաձայնում է և ձերբակալվում:
ATF-ի ներկայացուցիչները հերքում են իրենց հասցեին ուղղված մեղադրանքը: «Մենք պետք է նստենք և սպասենք, որպեսզի նա սպանություն կատարի, որից հետո նո՞ր նրան վատ տղա համարենք: Մենք պետք է նստենք և սպասենք այն հիմքով, որ նա բավականաչափ վատ անցյալ չունի՞»,- ասել է ATF-ի հատուկ գործողությունների բաժնի ղեկավար Չարլի Սմիթը:
