«Արցախբանկը» հերթական անգամ հայտնվել է սկանդալային պատմության կենտրոնում: Բանկը խնդիր ունի «Տոնուս» ընկերության կողմից խաբված բնակիչների հետ, ինչի կապակցությամբ բնակարանների սեփականատերերը մեկ անգամ չէ, որ բողոքի ակցիա են անցկացնում՝ պնդելով, որ «Տոնուսի» Աշոտն ու «Արցախբանկը» միասին յուրացրել են իրենց գումարը:
Այսօր «Վաչագան, Գևորգ» ՍՊ ընկերության նախագահ Վաչագան Մկրտչանը ներկայացրեց բանկի հետ կապված մեկ այլ միջադեպ, ինչի արդյունքում ինքը զրկվել է իր գրեթե ողջ ունեցվածքից:
«2006 թվականի ճգնաժամը, անկասակած, ազդեց ամեն ինչի վրա, բայց ամենաշատը՝ շինարարության և շինանյութի: Խնդիրն առաջացավ ճգնաժամից՝ իհարկե, բայց բանկը կարող էր նման դիրք չբռնել իմ հանդեպ: Ես դիմում գրեցի՝ խնդրելով իմ տոկոսադրույքներն իջեցնել, ժամկետը երկարացնել: Ես դիմել եմ բանկի նախագահին, որ կարողանամ գոնե այդ քիչ առևտրով գումարները մարել, նրանք տոկոսները չեն իջեցրել: Հետագայում ինձ ասում են, թե կասեցրել են, այնինչ տոկոսները գնալով ավելանում են. 134 հազար դոլարի տոկոսը կասեցնելու փոխարեն՝ այն հիմա չգիտեմ՝ ուր է հասել»:
Պարոն Մկրտչյանը պատմեց նաև, որ գրավոր դիմում է ուղարկել դեռ նախորդ տարվա դեկտեմբերին, ինչին ի պատասխան՝ միայն վերջերս բանավոր պատասխան է ստացել, թե՝ ինչ ուզեն, այն էլ կանեն. «Բանկի անվտանգությունը գալիս է օբյեկտ, օբյեկտը պլոմբում է, սեփականությունը հաշվում և ասում, որ ես իրավունք չունեմ օբյեկտ մտնելու, ու այդպես ինձ ամեն ինչից զրկում են: Ես այդ ընթացքում ամեն ինչ վաճառեցի՝ մեքենա, տուն և այլն»:
Բանախոսը նշեց նաև, որ հիմա պարտքը հասել է երևի թե 300 հազար դոլարի, ինչը, սակայն, նա չի պատրաստվում վճարել. «Իրենք ինձ լավ են ճանաչում, ես չեմ վճարի: Ինձ ասել էին՝ կասեցրել են, դու մի ասա ֆռռում է. հիմա ես գրավոր ոչ մի ապացույց չունեմ, որ դատարան ներկայացնեմ: Սակայն մարդ կխփեմ, բայց չեմ վճարի ու ինձ էլ սնանկ չեմ ճանաչի»:
