Ամերիկյան Սենատը առևտրի նախարարի պաշտոնում հաստատել է Պենի Պրիցկերին: Նրա թեկնածությանը կողմ է արտահայտվել 97 օրենսդիր, դեմ է եղել 1-ը: Այս մասին հայտնում է ITAR-TASS-ը:
ԱՄՆ նախագահ Բարաք Օբաման անմիջապես իր երախտագիտությունն է հայտնել սենատորներին Պրիցկերի թեկնածությանն աջակցելու համար՝ անվանելով նրան «փորձված ղեկավար, հաջողակ ձեռնարկատեր և առավել հարգելի կանանցից մեկը ժամանակակից բիզնեսում»: Նրա խոսքով՝ Պրիցկերը կլինի ԱՄՆ վարչակազմի տնտեսական թիմի առանցքային անդամը:
53-ամյա Պրիցկերը համարվում է հարուստ ամերիկուհիներից մեկն ու ամենահարուստը ներկայիս կաբինետի անդամների շարքում: Նրա կարողությունը գնահատվում է 1.85 մլրդ դոլար: Նա Օբամայի վաղեմի ծանոթն է:
Առևտրի նախկին նախարար Ջոն Բրայսոնը հրաժարական է տվել անցած տարվա հունիսին՝ առողջական խնդիրների պատճառով: Մինչ օրս նախարարի պարտականությունները կատարել է տեղակալ Ռեբեկա Բլանկը:
