Իսլանդիայում հաջողությամբ փորձարկվել է հուսալի և երկար ժամանակով ածխաթթու գազը պահածոյացնելու մեթոդը: Ջրում լուծված ածխաթթուն, որը մղվել է 400-800 մ խորության վրա գտնվող ծակոտկեն հրաբխային հանքաքարի մեջ, այնտեղ վերածվել է կրաքարի, հայտնում է TASS-ը: Գիտնականների կողմից կատարված փորձերի եզրակացությունները հրապարակվել են Science պարբերականում:
Նոր տեխնոլոգիան ապագայում կարող է օգնել նշանակալիորեն կրճատել ածխաթթու գազի արտանետումները Երկրի մթնոլորտ:
CarbFix նախագծի վրա աշխատող գիտնականների համար մեծ անակնկալ է եղել իսլանդական բազալտում կալցիումի և մագնեզիումի միացությունների հետ ածխածնի երկօքսիդի միացման ռեակցիաների լիարժեքությունը և արագությունը: Ընդամենը 2 տարում ածխաթթու գազի 95%-ը վերածվել է կալցիումի կարբոնատի՝ կրաքարային նստվածքի, որին կարելի է հանդիպել ողջ աշխարհում:
«Մեր մեթոդը հնարավորություն է տալիս արագ, արդյունավետ և անվտանգ թաղել CO2-ը: Մենք մեծ հույսեր ունենք ցույց տալու, որ գտել են էկոլոգիապես ռացիոնալ լուծում, որը, հույս ունեմ, ընդունելի կլինի նաև ֆինանսական տեսակետից»,- հայտարարել է Կոպենհագենի համալսարանի քիմիայի ֆակուլտետի դոցենտ, նախագծի մասնակից Կնուդ Դիդերիսկեն:
