Երևանում Գարեգին Նժդեհի հուշարձանի բացումը պետք է պահանջի Մոսկվայի կողմից դիվանագիտական ուղիներով անհապաղ արձագանք՝ «Վեստնիկ Կավկազա» առցանց պարբերականի հետ զրույցում նման կարծիք են հայտնել ռուս փորձագետները։
Քաղաքական հետազոտությունների ինստիտուտի տնօրեն Սերգեյ Մարկովն այս փաստը հրեշավոր է անվանել։
«Գարեգին Նժդեհի հուշարձանի բացումը վկայում է հայ հասարակությունում որոշ հզոր ուժերի առկայության մասին, որոնք ուղղված են Ռուսաստանի դեմ, քանի որ Ռուսաստանը գերմանական նացիզմի գլխավոր հաղթողն է։
Կոլաբորացիոնիստական զորքերի ստեղծումը, որոնք ծառայել են ֆաշիստական Գերմանիային, հրեշավոր հանցագործություն է, և Երևանի նման արարքը դուրս է գալիս բոլոր ընդունելի ձևաչափերից։ Դա պետք է պահանջի Ռուսաստանի վճռական արձագանքը՝ նացիստական կոլաբորացիոնիստների հերոսացումը դադարեցնելու պահանջով»,- կոչ է արել նա։
Նա ընդգծել է, որ հետխորհրդային պետությունների ազգային քաղաքականությունը չպետք է ջնջի «մեր ընդհանուր պատմությունը»։
«Սեփական պատմության տարբեր փուլերի հաշտեցման փորձերում պետք է գոյություն ունենա բանականություն, պատմության նման շրջաններն ու անձերին պետք չէ ներառել ընդհանուր համատեքստ, այլ հակառակը՝ բացառել դրական շարքից։ Հայաստանի ղեկավարությունը դրանով իսկ իրեն դրեց Լատվիայի, Էստոնիայի և ներկայիս Ուկրաինայի ղեկավարության հետ մեկ շարքում, որոնք փառաբանում են նացիստ կոլաբորացիոնիստներին»,- ասել է Մարկովը։
«Համագործակցությունը գերմանական նացիզմի հետ և դրանով իսկ մասնակցությունը նրա հրեշավոր հանցագործություններում, այդ թվում՝ ռուս ժողովրդի ցեղասպանությունում՝ գերմանական նացիզմի կարևորագույն ձգտումներից մեկում, պետք է ջնջի ցանկացած արժանիք։ Մոսկվան պետք է պահանջի Երևանից դադարեցնել նացիստական հանցագործների հերոսացման քաղաքականությունը։ Այդ հարցը պետք է մշտապես լինի հայ-ռուսական բանակցությունների սեղանին»,- եզրափակել է նա։
