Ավելի ու ավելի քիչ հայաստանցիներ են նախընտրում հանգստանալ մեր երկրի սահմաններում, փոխարենը շեշտակի աճում է Վրաստանում հանգստացող հայաստանցիների թիվը:
Պաշտոնական տվյալներով` այս տարվա առաջին երեք ամիսներին հանրապետությունում տեղաբաշխված զբոսաշրջային կոլեկտիվ և անհատական միջոցներում (կացարաններում) տեղավորված տուրիստների թիվը նվազել է մոտ 10%-ով` նախորդ տարվա նույն ժամանակահատվածի համեմատ: Մինչդեռ Վրաստանի վիճակագրությունը հունվար-ապրիլ ամիսներին ֆիքսել է 250 հազար այցելուներ Հայաստանից, ինչը գերազանցում է նախորդ տարվա ցուցանիշը 53%-ով:
Ամառային սեզոնի վիճակագրությունը ևս տպավորիչ է:
Վրաստանի տուրիզմի ազգային վարչության ղեկավար Ռուսուդան Մամացաշվիլիի խոսքով` անցած տարի Վրաստան է այցելել ավելի քան 900 հազար հայաստանցի, մոտ 30 տոկոսով շատ 2011-ից: «Նրանց մեծ մասը գալիս է օգոստոսին և այցելում (մոտ 83 տոկոսը) սևծովյան հանգստի վայրերը` Բաթում, Քոբուլեթի, Ուռեկի: Այսինքն` հայաստանցիները Վրաստան գալիս են գերազանցապես հանգստի նպատակով, թեև կան նաև հարազատներին այցելողներ»,- ասում է Ռ. Մամացաշվիլին: Նրա խոսքով` ամենաշատը Վրաստան այցելում են թուրք և ադրբեջանցի տուրիստները, հայերը երրորդ տեղում են (ընդհանուր այցելուների մոտ 22%-ը), ռուսները` չորրորդ: Անցած տարի` 2012-ին, Վրաստան այցելել է մոտ 4 մլն զբոսաշրջիկ: Համեմատության համար ասենք, որ նույն թվականին Հայաստան այցելել է 840 հազար զբոսաշրջիկ: Ամառային սեզոնին սևծովյան հանգստավայրերում գիշերակացի գները 1 անձի համար սկսվում են 10 լարիից կամ մոտ 2600 դրամից: Կախված նրանից, թե ծովափի ինչ ծառայություններից կօգտվեն զբոսաշրջիկները, 7-օրյա հանգիստը մեկ անձի վրա կարող է նստել մի քանի հարյուր եվրո:
Հայաստանում գները անհամեմատ ավելի թանկ են: Էկոնոմիկայի նախարարության կայքում տեղադրված են այն տուրիստական ընկերությունները, որոնք մեր կառավարությունը համարել է քաղծառայողների սոցիալական փաթեթի հանգստի ապահովման ծառայություններ մատուցող զբոսաշրջային օպերատորներ: Սեղմելով ընկերությունների անվանումների հղումները` կարելի է ծանոթանալ առաջարկվող ծառայություններին ու գներին: Օրինակ` 3-անգամյա սնունդով Ծաղկաձորի գրողների տանը հանգստանալու դիմաց 2 անձի համար վճարը սկսվում է 36 հազար դրամից: Սա առաջարկվող ամենացածր գինն է: Մնացած երկօրյա փաթեթների գները Սևանում, Դիլիջանում, Ջերմուկում, Աղվերանում հիմնականում 60-80 հազար դրամի սահմաններում են:
Վրաստանում արձանագրված կարմրուկի դեպքերը (կամ ավելի ճիշտ` դրանց մասին Հայաստանում պաշտոնապես տարածվող լուրերը) արդյոք որևէ նշանակություն կունենա՞ն հայաստանցիների ընտրության հարցում` հանգստի վայր ընտրելիս, ժամանակը ցույց կտա: Ակնհայտ է սակայն, որ այս տարի Վրաստան այցելող հայաստանցիների թիվը կանցնի 1 մլն-ից:
