Նյու Յորքի քաղաքապետ Մայքլ Բլումբերգը հունիսի 11-ին ներկայացրել է կլիմայական փոփոխություններից քաղաքը պաշտպանելու ծրագիր, որում ներառված են ջրի մակարդակի ու օդի ջերմաստիճանի բարձրացումները՝ հաղորդում է Associated Press-ը:
Ծրագրում ներառված է 250 կետ, այն կարժենա 20 մլրդ դոլար:
Բլումբերգի նախագիծը, մասնավորապես, նախատեսում է շարժական պատերի տեղադրում Մանհեթենը ջրհեղեղից պաշտպանելու նպատակով: Սթեյն Այլենդում և Բրուքլինում այդ նպատակով ծրագրվում է կառուցել արգելապատնեշներ:
Ջրհեղեղի դեպքում շինությունները ամրացնելու նպատակով տանտերերին ծրագրվում է հատկացնել մոտ 1.2 մլրդ դոլար, իսկ ծերանոցներին՝ մոտ 50 մլն դոլար:
Բլումբերգի ծրագրի համաձայն՝ հավանական ջրհեղեղի շրջաններում տեղակայված բժշկական հաստատությունները պետք է արդիականացնեն էլեկտրացանցերն ու սարքավորումները՝ նախատեսված ջրահեռացման համար:
«Դա հրատապ աշխատանք է, ու մենք պետք է այն հիմա սկսենք»,- հայտարարել է Բլումբերգը, ում լիազորությունները լրանում են 2013թ. վերջին:
«Աստիճանաբար, երկար տարիների ու անգամ տասնամյակների ընթացքում մենք կկարողանանք ստեղծել քաղաք, որը ի վիճակի կլինի ավելի լավ դիմակայել ու դիմանալ ամեն ինչի»,- ընդգծել է նա:
Նյու Յորքը կլիմայական վատ պայմաններից պաշտպանելու ծրագիր մշակելու աշխատանքները ակտիվացան 2012թ. աշնանը՝ «Սենդի» փոթորկից հետո:
