Ռուսական RIA Novosti լրատվական գործակալության փոխանցմամբ՝ Ռուսաստանի նախագահի մամլո քարտուղար Դմիտրի Պեսկովը հայտարարել է, որ Մոսկվան հուսով է՝ Ղարաբաղյան հակամարտության կողմերը կխուսափեն այնպիսի քայլեր ձեռնարկելուց, որոնք կարող են խախտել բավական փխրուն հրադադարը:
Երբ լրագրողները Պեսկովին հարցրել են, թե արդյոք Մոսկվայի հետ քննարկվե՞լ է Հայաստանի կողմից ԼՂՀ-ի ճանաչման մասին օրինագիծը, նա բացասական պատասխան է տվել:
«Ո՛չ, դա չի քննարկվել Մոսկվայի հետ: Մենք շատ ուշադիր հետևում ենք այն որոշումներին, որոնք ընդունվում են այդ համատեքստում: Եվ անկասկած է, որ մենք նախկինի նման հուսով ենք, որ հակամարտող կողմերը կխուսափեն այնպիսի քայլեր ձեռնարկելուց, որոնք կարող են խախտել բավական փխրուն հրադադարն ու ընդհանուր առմամբ հանգեցնել լարվածության էսկալացմանը Լեռնային Ղարաբաղում»,- ասել է նա:
