«Նիկոլ Աղբալյան» ուսանողական միության ատենապետ Միքայել Խոսրովյանի կարծիքով, երիտասարդները վերջին շրջանում չեն դրսեւորում այն ակտիվությունը, որը կար 5-10 տարի առաջ. «Դա թե՛ քաղաքական, թե՛ սոցիալական խնդիրների հետեւանք է: Երիտասարդության հիմնական հատվածը կուսակցականացված է, մի մասն էլ անտարբեր է: Ուսանողական կազմակերպությունների գործունեությունը հիմնականում թելադրված է, նրանք ազատ մտածելու, անկախ որոշումներ կայացնելու եւ արտահայտվելու հնարավորություն չունեն»:
Ըստ Միքայելի՝ Արցախի եւ Հայաստանի երիտասարդների մեջ բավականին տարբերություն կա. «Արտաքին հարցերի հետ կապված շատ խնդիրներ Հայաստանի երիտասարդությանը չի մտահոգում, իսկ Արցախի երիտասարդությունը այլ կերպ է մտածում»:
Միքայելի խոսքերով, երիտասարդության ակտիվության նվազումը պայմանավորված է նրանց նկատմամբ պետության անուշադրությամբ. «Մենք առաջարկ ունեինք, որ եթե ուսանողը վարձ է վճարում, ապա թող պետությունը գոնե ապահովի երթուղայինի կամ համալսարանում սնվելու ծախսերը: Այսօր պետությունը ոչ մի կերպ չի աջակցում երիտասարդին, գոնե փոքր-ինչ չի լուծում նրա սոցիալական խնդիրները»:
Միքայել Խոսրովյանի կարծիքով, աննորմալ է, որ այսօր բուհերի ուսանողական խորհուրդները կուսակցականացված են. «Ուսխորհուրդները չեն ծառայում իրենց նպատակին. նրանք պետք է ուսանողի շահերը պաշտպանեն, սակայն այսօր դրանք մի քանի հոգու անձնական խնդիրների եւ կարիերայի ձեւավորմանն են ծառայում: Չափազանց վատ եւ տհաճ երեւույթ է նաեւ այն, որ ՈւԽ-ի անդամները հիմնականում ՀՀԿ-ական կամ ԲՀԿ-ական են»:
