Մայիսի 8-ը Շուշիի ազատագրման և Երկրապահի օրն է: Ազատամարտիկ, նախկին քաղբանտարկյալ Մյասնիկ Մալխասյանը «Առաջին լրատվականի» հետ զրույցում կարծիք հայտնեց, որ պետք է պահպանվի այդ օրվա խորհուրդը, քանզի մեր ժողովուրդը երազել է այդ հաղթանակը և բազում զոհերի գնով է այն նվաճել:
Մալխասյանը նկատեց, որ այսօրվա բարոյահոգեբանական մթնոլորտը թույլ չի տալիս մեզ այդ տոնն ի սրտե նշելու, քանզի բանտում են գտնվում ազատամարտիկներ, Շուշիի ազատագրման մասնակից Սասուն Միքայելյանը:
Այդուամենայնիվ, Մալխասյանը նշեց, որ անգամ բանտում գտնվելով, այդ ազատամարտիկները չեն նեղացել իրենց հայրենիքից և հուսալքված չեն:
Մալխասյանը նկատեց, որ այսօր երկրում ընդհանուր ընկճվածություն կա, քանզի ժողովրդի մեծ մասը ցանկանում է լքել հայրենիքը. «Հարց է առաջանում, թե ինչի՞ համար մենք տվեցինք այդ զոհերը` նրա համար որ մեր հայրենակիցները լքե՞ն հայրենիքը: Սա է, որ մեզ ցավ է պատճառում»:
Սակայն, ըստ Մալխասյանի, պետք չէ հուսալքվել, և պետք է ամեն ինչ անել, որպեսզի ժողովրդի մոտ վերականգնվի հաղթանակի ոգին. «Ոչինչ ավարտված չէ, և ամեն ինչ առջևում է: Մեր ժողովրդի մեջ կա այդ կամքը, քանզի Մարտի 1-ից հետո երեք տարի ժողովուրդը փողոցում պայքարեց, որպեսզի վերականգնի այն արժեքները, որին արժանի ենք մենք բոլորս: Ես համոզված եմ, որ մենք այդ հաղթանակները նշելու ենք ըստ արժանվույն»:
Մյասնիկ Մալխասյանը Շուշիի ազատագրման օրվա կապակցությամբ շնորհավորեց հայ ժողովրդին, իր բոլոր ազատամարտիկ ընկերներին, զոհված ազատամարտիկների ընտանիքներին և Սպարապետին. «Ամենամեծ տոնն իր համար այդ օրն էր, որով նա ոգեշնչվում և ապրում էր: Ես կուզենայի, որ մենք հաջորդ տարի նոր ցնծությամբ նշեինք այդ հաղթանակի օրը, որպեսզի այսուհետ մարտի մեկերը ստվեր չգցեին այդ տոնի վրա»:
Մալխասյանը հույս հայտնեց, որ բոլոր քաղբանտարկյալները` Սասուն Միքայելյանի գլխավորությամբ, Շուշիի ազատագրման օրը կտոնեն ազատության մեջ:
