Վատիկանում հետաքննություն է սկսվել Հռոմի Bambin Gesù մանկական հիվանդանոցի նախկին ղեկավար և գանձապահ Ջուզեպե Պրոֆիտիի և Մասիմո Սպինայի նկատմամբ՝ ավելի քան 400 հազար եվրոյի գողության, յուրացման և ապօրինի օգտագործման կասկածանքով: Գումարը հատկացվել է հիվանդ երեխաների բուժման համար, բայց ծախսվել Վատիկանի նախկին պետքարտուղար, կարդինալ Տարիչիզիո Բերտոնեի բնակարանի վերանորոգման համար: Այս մասին հայտնում է RIA Novsoti-ն:
l’Espresso պարբերականում (նոր համարը լույս կտեսնի ապրիլի 1-ին) հայտնի վատիկանիստ Էմիլիանո Ֆիտիպալդին գրում է առկա փաստագրական հավաստումների մասին առ այն, որ Վատիկանի ամենաազդեցիկ անձանցից մեկի տան վերանորոգման համար, որն արժեցել է 422 հազար եվրո, վճարվել է Bambin Gesù մանկական հիվանդանոցի հիմնադրամի հաշվին:
Մասնավորապես, ամսագրի տրամադրության տակ է 2013թ. նոյեմբերի 7-ի նամակ, որը գրել է Ջուզեպե Պրոֆիտին և հասցեագրել է կարդինալին, որում Bambin Gesù հիվանդանոցի նախկին ղեկավարը Բերտոնեին առաջարկում է վճարել նրա բնակարանի վերանորոգման համար՝ «կազմակերպչական հանդիպումների» դիմաց: Հաջորդ օրը Բերտոնեն պատասխան նամակ է ուղարկում, որում Պրոֆիտիին շնորհակալություն է հայտնում առաջարկի համար, ընդունում է այն և նույնիսկ կցում է այն աշխատանքների ցուցակը, որոք պետք է արվեն իր տանը:
Հոդվածում Ֆիտիպալդին նշում է, որ ավելի վաղ կարդինալ Բերտոնեն միշտ հայտարարել է, որ վերանորոգման համար «իր գրպանից 300 հազար եվրո է» վճարել և երբեք Bambin Gesù-ի հիմնադրամին որևէ բանի համար վճարելու ոչ մի հրահանգ չի տվել:
«Հետաքննության փաստաթղթերում Բերտոնեի անունը չի հիշատակվում, բայց հազիվ թե Սուրբ գահը կարողանա խուսափել սկանդալին նրա ուղղակի մասնակցությունից»,- գրում է լրագրողը:
