Այս տարվա քննություններն այնքան թեժ չեն լինի, բայց այնքան խաղաղ էլ չեն լինի, ինչպես մենք կարող ենք ակնկալել: Իսկ լրագրողները չեն հայտագրվի, այլ լրագրողական քարտով կներկայանան: Այս մասին այսօր հայտնեցին Գնահատման և թեստավորման կենտրոնից:
Գնահատման և թեստավորման կենտրոնի մշակումների և կազմակերպական բաժնի պետ Կարո Նասիբյանը ևս մեկ անգամ հիշեցրեց, որ կենտրոնում ամփոփվել են դիմորդների տվյալները, և ամփոփման արդյունքում առաջին փուլում քննություն կհանձնի 10209 դիմորդ: Եթե համեմատենք նախորդ տարվա դիմորդների թվի հետ, ապա նկատելի է, որ այս տարի դիմորդների թիվը անհամեմատ նվազել է:
Խոսելով պատճառների մասին՝ Կ. Նասիբյանը մանրամասնեց. «Այս տարի ՀՀ-ում հանրակրթական հաստատությունները շրջանավարտներ չունեն: Առաջին փուլի դիմորդները հիմնականում նախորդ տարվա շրջանավարտներն են, անցյալ տարի մրցույթից դուրս մնացած շրջանավարտները, բանակից զորացրվածները և նախորդ տարիներին դպրոցն ավարտած սփյուռքի մեր հայրենակիցները»:
Հիշեցենք, որ Գնահատման և թեստավորման կենտրոնը իր միասնական քաննությունները կազմակերպում է երկու փուլով: Հիմնական փուլ և լրացուցիչ փուլ: Հիմնական փուլի դիմում հայտերը հավաքվել են ապրիլի 10-ին, իսկ լրացուցիչ փուլը կսկսվի հունիսի 24-ից և կտևի մինչև հուլիսի 2-ը: Սակայն դա չի վերաբերում արտերկրի ուսանողներին և զորակոչիկներին:
Նա նաև տեղեկացրեց, որ ընդունելության կարգում որոշակի փոփոխություններ են կատարվել և ավելացրեց. «Ամենից առաջ ՀՀ պետական 28 բուհերին և նրանց մասնաճյուղերին ավելացել են նաև ոչ պետական բարձրագույն պետական հաստատություններ՝ թվով 40 բուհ: Այսինքն՝ ընդունելության նոր կարգով ոչ պետական բուհերի դիմորդները ևս կմասնակցեն միասնական քննություններին:
Երկրորդ փոփոխությունն այն է, որ այս տարի դիմորդներին թույլատրվում է հայտագրել 2 անվճար և 8 վճարովի մասնագիտություններ:
Փոփոխություններ է կատարվել նաև կարգում` հանրապետական ընդունող հանձնաժողովը բաղկացած էր 25 հոգուց, նոր կարգով ոչ պետական բուհերից ևս երկուսը կընդգրկվեն հանրապետական ընդունող հանձաժողովի կազմում:
Այս տարի անվճար տեղերի համար կա 2428 դիմում, իսկ վճարովի տեղերի համար՝ 18 հազար 500»:
