Շոկոլադե բատոններ արտադրող ամերիկյան Mars Inc ընկերությունը որոշել է 55 երկրներից հետ կանչել իր ապրանքը՝ դրանցում հայտնաբերված պլաստիկի պատճառով: Այս մասին հայտնում է BBC-ն:
Սակայն հայտնի է դարձել, որ Ռուսաստանի շուկայից այն չեն պատրաստվում հետ կանչել: «Ռուսաստանում ապրանքի հետկանչ չի լինի, քանի որ մեր արտադրությունը տեղայնացված է և կապված չէ արտասահմանյանի հետ»,- ասել է կորպորատիվ հարաբերությունների գծով Ռուսաստանի ընկերության ներկայացուցիչ Ելիզավետա Ալեքսանդրովնան:
Կարմիր պլաստիկի կտորը հայտնաբերվել է Գերմանիայում գնված Snickers բատոնի մեջ՝ հունվարի 8-ին: Սպառողը դիմել է Mars-ին, որից հետո ընկերության մասնագետները պարզել են, որ խոտանված բատոնը արտադրվել է Հոլանդիայի Ֆեխել քաղաքում:
Հոլանդիայի Mars ձեռնարկության արտադրանքը առաքվում է ամբողջ աշխարհում: Դա առաջին նմանատիպ դեպքն է տվյալ ձեռնարկությունում, որն աշխատում է 1963 թվականից:
