Ընդդիմադիր Հայ ազգային կոնգրեսը (ՀԱԿ) երկուշաբթի հանցագործության մասին հաղորդումների փաթեթ է ուղարկել Հատուկ քննչական ծառայություն` պահանջելով քրեական գործեր հարուցել, նախաքննություն սկսել Երևանի մի շարք ընտրատեղամասերում իրենց վկայակոչած «հանցագործության փաստերի» առնչությամբ, հայտնաբերել և քրեական պատասխանատվության ենթարկել մեղավորներին: Փաթեթը ներառում է մեկ տասնյակ հաղորդումներ մոտ երեք տասնյակ դեպքերի մասին:
Ինչպես «Ազատություն» ռադիոկայանի հետ զրույցում մեկնաբանել է Կոնգրեսի իրավական աջակցության կենտրոնը համակարգող Արմեն Խաչատրյանը, հաղորդումների մեջ ամփոփել են Երևանի ավագանու ընտրություններում բաց քվեարկությունների, ուրիշի փոխարեն քվեարկությունների, գրանցամատյանների անհետացման, վստահված անձանց նկատմամբ բռնությունների, թաղային հեղինակությունների կողմից ընտրությունները ուղղորդելու և այլ դեպքեր: Խաչատրյանը վկայակոչեց ամենաաղմկահարույց փաստերը Մալաթիայի, Կենտրոնի, Էրեբունու, Նոր Նորքի ընտրատեղամասերից:
«Օրինակ, 9/28-ում գործի դրվեցին 2003, 2007 թվականների ավանդույթները` տոտալ, բռնի ուժի կիրառմամբ ընտրությունները կեղծելու ավանդույթները. հանձնաժողովը գրեթե զրկված է եղել իր նորմալ գործունեությունն իրականացնելուց, ըստ էության, տեղի է ունեցել բաց քվեարկություն, գործել է երկու խումբ. մի խումբը դրսից բերել է ընտրողներին, մյուս խումբը հենց քվեարկության կենտրոնում վերահսկել է այդ քվեարկությունը: Ինչպես նաև նշված են նույն տեղամասի հանձնաժողովի կողմից կատարված ապօրինություններ, ինչպիսիք են` ամփոփիչ թերթիկի տվյալների փոփոխություն, քվեաթերթիկների անհետացում: Միայն այդ տեղամասի հետ կապված մեկ հաղորդման մեջ ներկայացված են մի շարք դեպքեր, որոնք պարունակում են հանցակազմ», – ասել է Խաչատրյանը:
«Այդպիսի տեղամասեր կան նաև Մալաթիայում. ուզում եմ հիշատակել. մասնավորապես, 8/22 տեղամասը: Ըստ մեր հավաստի տեղեկությունների` այդ տեղամասի մատյանը գողացվել է, գրանցամատյանը պարզապես գոյություն չունի», – հավելել է նա:
Կոնգրեսի ներկայացուցիչներին այդպես էլ չի հաջողվել բացել տալ նշված 8/22 տեղամասի պարկերն ու փաստաթղթերը: Չնայած թիվ 8 ընտրատարածքային ընտրական հանձնաժողովին վերահաշվարկի դիմում ներկայացված եղել է, սակայն հանձնաժողովը այլ դիմումներով այլ տեղամասերի պարկեր է բացել, մինչ վերահաշվարկի համար սահմանված ժամկետն ավարտվել է, և հերթը այս տեղամասին այդպես էլ չի հասել:
«Այստեղ ակնհայտ անգործություն կա ընտրատարածքային հանձնաժողովի կողմից, սակայն այդ անգործությունը հանցավոր գործողություններ պարտակելու միտում է ունեցել», – ընդգծել է ՀԱԿ-ի ներկայացուցիչը:
10/06 տեղամասի վերաբերյալ Արմեն Խաչատրյանը «կրկնակի քվեարկության» դեպքեր է մատնանշել:
«Ստորագրված ցուցակների քաղվածքներն անելուց հետո պարզել ենք, որ կան նաև բազմաթիվ կրկնակի քվեարկության դեպքեր, մասնավորապես, նույն անձնագրի սերիայով, նույն ստորագրությամբ երկու տողում հայտնաբերել ենք քվեարկություն: Այսինքն` նույն անձը իր անձնագրով երկու անգամ նույն տեղամասում քվեարկություն է կատարել: Բացի դրանից, այդ տեղամասում հանձնաժողովի նախագահը, ով իրավասություն չունի գրանցամատյանում քվեարկողի տվյալներ լրացնել, նրա կնիքն է դրված այնտեղ, ընդ որում բացակայում է կամ անձնագրի սերիան կամ ստորագրությունը: Սա նախագահի կողմից լիազորությունները գերազանցել է, կամ իր լիազորություններից դուրս գործողություններ կատարել: Նմանատիպ բազմաթիվ դեպքեր կան, որոնք մանրամասն շարադրված են հաղորդումների մեջ», – ասել է Խաչատրյանը:
Հատուկ քննչական ծառայություն ուղարկված հաղորդումների մեջ նաև 2/30 ընտրատեղամասն է հիշատակվել, որտեղ, ըստ ՀԱԿ ներկայացուցչի, ընտրողներին ուղղորդելու նպատակով դրսից 20-30 հոգանոց խումբ էր ներխուժել տեղամաս, բռնություն գործադրել ընդդիմադիր վստահված անձի նկատմամբ:
Ինչպես այս, այնպես էլ հաղորդման մեջ հիշատակված մի շարք այլ տեղամասերում ընտրությունների արդյունքներն անվավեր ճանաչելու համար Կոնգրեսը դիմել էր ընտրատարածքային հանձնաժողովներ, սակայն բոլոր դիմումները մերժվել են: Կոնգրեսի դիտարկումներով` թաղային տարրերի կողմից ընտրությունների վերահսկումը եղել է «համատարած, համակարգված, տոտալ բնույթ է ունեցել, և ընտրությունների արդյունքները պայմանավորված են հենց այդ համակարգված գործողություններով»:
«Իսկ ոստիկանները որոշ դեպքերում մատնվել են անգործության, որոշ դեպքերում գործող անձինք եղել..
Լուսանկարը` PanARMENIAN Photo-ի
