Արմավիրի մարզի ընդհանուր իրավասության դատարանի Էջմիածնի նստավայրում Վահե Խալաթյանի նախագահությամբ ընթանում է Գևորգ Մանուկյանի և Մյասնիկ Արսենյանի գործի դատավարությունը:
Ըստ մեղադրանքի՝ Գևորգ Մանուկյանը, ծառայելով ոստիկանության զորքերում՝ որպես հասարակական կարգի պահպանության դասակի հրաձիգ, կոչումով՝ կրտսեր սերժանտ, և նրա համածառայող, սերժանտ Մյասնիկ Արսենյանը նախնական հանցավոր համաձայնության են եկել: 2012 թվականի սեպտեմբերի 6-ի կեսգիշերին՝ 00 ժամ 30 րոպեի սահմաններում, նրանք, Երևանի Սեբաստիա փողոցի և Իսակովի պողոտայի հատման խաչմերուկից Արարատի մարզի 27-ամյա բնակչուհի Լ.-ին բռնությամբ նստեցնելով Մյասնիկի վարած «Մերսեդես Բենց» ավտոմեքենան, բացահայտ առևանգել են:
Մեքենան վարել են Արարատի մարզի Արգավանդ գյուղի ուղղությամբ:
Ճանապարհին Լ.-ն շարունակ աղմկել ու գոռացել է: Նրան մեքենայից իջեցրել են ու բռնությամբ տեղավորել մեքենայի բեռնախցի մեջ:
Տարել են Մուսալեռ գյուղի եկեղեցու մոտակա տարածք, որտեղ աղջկան մեքենայից իջեցրել են ու, նրա կամքին հակառակ, սեռական հարաբերություններ ունեցել հետը:
Սա վերջին շրջանում սեռական բռնության եզակի դեպքը չէ, ցավոք, որ կատարվում է գյուղական եկեղեցու տարածքում՝ ի ցույց հանելով բռնացողների անհավատությունը՝ ամեն ինչի նկատմամբ, միայն կրքերով առաջնորդվելու, կրքերին ամեն գնով հագուրդ տալու նրանց տենչն ու հանցավոր նպատակասլացությունը:
Այս 28-ամյա երիտասարդներին ոչինչ չի կանգնեցրել՝ ոչ առևանգված աղջկա բղավոցները, ոչ եկեղեցու հայացքն իրենց վրա: Գոնե գյուղի՝ Մուսալեռի անունը կանգնեցներ, հուշեր, որ իրենք զինվորական են, հասարակական կարգի պահպանությանն են ծառայում, կոչում ու պարտականություններ ունեն…
Մանուկյանին ու Արսենյանին մեղադրանք է առաջադրվել ՀՀ քրեական օրենսգրքի 131 հոդվածի 2-րդ մասի 1-ին կետով և 138 հոդվածի 1-ին մասով: Նրանց նկատմամբ խափանման միջոց է ընտրվել կալանավորումը:
