ԱՄՆ Քլիվլենդ քաղաքի դատարանը երեք աղջիկների առևանգման մեջ մեղադրվող Արիել Կաստրոյին ազատ արձակելու դիմաց 8 միլիոն դոլար գրավ է նշանակել: Հինգշաբթի օրն այս մասին տեղեկացրել է Associated Press գործակալությունը:
Դա դատարան 52-ամյա Կաստրոյի առաջին ներկայանալն էր: Դատական նիստն ընդամենը մի քանի րոպե է տևել, ընդ որում՝ մեղադրյալն ամբողջ ժամանակ հատակին է նայել և ոչ մի բառ չի արտաբերել. նրա փոխարեն խոսել է փաստաբանը:
Գործակալության կարծիքով՝ այդ գումարն ինքնին բացառում է Կաստրոյի ազատության մեջ հայտնվելու հնարավորությունը:
Ամանդա Բերրին, Ջինա Դեհեսուսը և Միշել Նայթը հայտնաբերվել են Կաստրոյի տանը այն բանից հետո, երբ նրանցից մեկին հաջողվել է օգնություն կանչել: Երեք աղջիկներին առևանգելուց բացի, Կաստրոն մեղադրվում է նաև իր տանը ծնված՝ Բերրիի վեցամյա դստերը պահելու մեջ:
Դատախազությունը մեղադրանք է հարուցել միայն տան սեփականատիրոջ՝ Արիել Կաստրոյի նկատմամբ, նա մեղադրվում է աղջիկներին առևանգելու և բռնաբարելու մեջ:
Facebook-ում Կաստրոյի էջն «իդեալական» է՝ ոչ մի էրոտիկ կամ բռնության մասին հիշեցնող սյուժե կամ հղում, ոչ մի ակնարկ այն մասին, որ օգտատերը, հնարավոր է, «երկակի կյանք» է վարում:
Հիշեցնենք, որ ոստիկանությունն Արիելի հետ միասին ձերբակալել է նաև նրա երկու եղբայրներին:
