«Արմավիա»-ի սնանկացումը կազդի ավելի շատ արտագնա, քան ներգնա տուրիզմի զարգացման վրա: Նման կարծիք «Առաջին լրատվական»-ի հետ զրույցում հայտնեց «Արմենիա թրավել» տուրիստական գործակալության ներգնա տուրիզմի մասնագետ Ալեքսանդր Կուզնեցովը։ ««Արմավիա»-ի սնանկացումը կամ առհասարակ փակումը մեծ ազդեցություն չունի զբոսաշրջիկների թվի վրա: Իմ ուսումնասիրությունների համաձայն՝ մեր զբոսաշրջիկները հիմնականում Եվրոպայից են և նախընտրում են այստեղ գալ եվրոպական ավիաընկերությունների ինքնաթիռներով: Բացի այդ, հարկ եմ համարում նշել, որ վերջին տարիներին «Արմավիա»-ն կորցրել էր իր նախկին պահանջարկը, քանի որ ո՛չ գներն էին հարմար, ո՛չ էլ ծառայություններն էին մատչելի: Պաշտոնական վիճակագրական տվյալների համաձայն՝ մեր երկիր նախորդ տարվա ընթացքում այցելել են շուրջ 900․000 զբոսաշրջիկներ. այդ զբոսաշրջիկներից բավականին մեծ թիվ են կազմում սփյուռքահայերը»,- նշեց նա:
Ա․ Կուզնեցովը նշեց, որ Ռուսաստանից, ինչպես նաև եվրոպական այլ երկրներից Հայաստան ժամանած զբոսաշրջիկները նախընտրում են օգտվել եվրոպական ավիաընկերությունների ծառայություններից. ««Արմավիա»-ն առաջին հերթին ապահովում էր ավիափոխադրումները Ռուսաստանի սփյուռքահայերի համար, որոնց այս վերջին տարիներին չէին բավարարում այդ ավիաընկերության պայմանները»:
Մեր զրուցակիցը հավելեց, որ ընկերության սնանկացումը կարող է արտագնա տուրիզմի վրա որոշ չափով ազդել, քանի որ այստեղ բնակվող հայերն ինչ-որ չափով նախընտրում էին հենց այդ ավիաընկերությունը, իսկ հիմա շատերը Հայաստանից մեկնում են կամ այլ ընկերությունների միջոցով, կամ էլ՝ ավտոբուսներով. «Հաճախ են լինում դժգոհություններ՝ կապված գների հետ։ Այդ պատճառով շատերը նախընտրում են գնալ ավտոբուսներով»:
Զագահարելով մի քանի տուրիստական գործակալություններ՝ «Առաջին լրատվական»-ը պարզեց, որ Երևան-Մոսկվա ավտոբուսի մեկ տոմսի արժեքը տատանվում 40-45 հազար դրամի սահմաններում, մինչդեռ Ա. Կուզնեցովը նշեց, որ սեզոնի հետ կապված՝ բավականին կթանկանան ինքնաթիռի տոմսերը։
