Սաուդյան Արաբիան պատրաստ է հանդուրժել նավթի ցածր գները հանուն շուկայում իր բաժնի պահպանման և դրանից ԱՄՆ-ին դուրս մղելու: Այս մասին հինգշաբթի Trend-ին ասել է Real politik վերլուծական ծառայության նախկին ղեկավար, ղազախ անկախ քաղաքական վերլուծաբան Թալգաթ Մամիրայիմովը:
Նրա խոսքով՝ նավթն էժանանում է օբյեկտիվ պատճառներով:
«Նախ՝ Իրանը շատ շուտով շուկա դուրս կգա: Երկրորդ՝ Սաուդյան Արաբիան հայտարարել է, որ պատրաստ է դիմանալ նավթի մեկ բարելի դիմաց 10 դոլար գնին: Սաուդյան Արաբիան ձգտում է իր տեղը զբաղեցնել շուկայում և դուրս մղել ամերիկյան թերթաքարային նավթի մատակարարներին»,- ասել է նա:
Մամիրայիմովի խոսքով՝ նավթի գները կշարունակեն ընկնել և կարող են հասնել 10-15 դոլարի մեկ բարելի դիմաց:
Փորձագետը նաև կարծում է, որ նավթային խոշոր խաղացողները մտադիր են դուրս գալ նավթային բիզնեսից և ներդրում են անում էներգիայի այլընտրանքային աղբյուրների ոլորտում:
«Դա խոսում է այն մասին, որ ֆոնդային շուկաներում խաղերը կլինեն ոչ նավթային շուկայի օգտին, քանի որ արևմտյան խոշոր կապիտալը սկսում է դրանից հեռանալ»,- ասել է նա: