2016 թվականի հունվարի 1-11-ը Միջերկրական ծովով Եվրոպա են ժամանել 18 հազար 882 ներգաղթյալ և փախստական, 53 մարդ մահացել է ծովում։ Այս մասին Ժնևում ճեպազրույցի ժամանակ ասել է Միգրացիայի միջազգային կազմակերպության պաշտոնական ներկայացուցիչ Ջոել Միլմանը՝ փոխանցում է TASS գործակալությունը։
Նրա խոսքով՝ օրական միջինը ավելի քան 1700 մարդ է ժամանում։ Հիմնական հոսքը, ինչպես եղել է 2015 թվականին, այժմ ևս ուղղվում է Հունաստան, որտեղ տարեսկզբից ժամանել է 18 հազար 615 մարդ։
Միլմանի խոսքով՝ անցած տարի Հունաստան է ժամանել մոտ 850 հազար մարդ ավելի քան 70 երկրներից, հիմնականում սիրիացիներ՝ մոտ 476 հազար, աֆղաններ՝ ավելի քան 205 հազար, և իրաքցիներ՝ մոտ 87 հազար։ Հունաստան ժամանածների թվում նշվում են 9 հայեր։
Ամենից մեծ թվով փախստականներն ու ներգաղթյալները ժամանել են սեպտեմբերին՝ ավելի քան 211 հազար։
Ընդհանուր առմամբ 2015 թվականին Միջերկրական ծովով Եվրոպա է ժամանել 1 մլն 4356 ներգաղթյալ։ Դա ավելի քան քառակի մեծ է 2014-ից, երբ ժամանել էր 219 հազար մարդ։
