Վրացական Apsny.ge կայքի փոխանցմամբ, Շվեյցարիայի Բեռն քաղաքում արդեն ավարտվել է Առևտրի համաշխարհային կազմակերպությանը (ԱՀԿ) Ռուսաստանի անդամակցության շուրջ ռուս-վրացական բանակցությունների երկրորդ փուլը:
Վրաստանի վարչապետի մամլո խոսնակ Նիկո Մչեդլիշվիլիի խոսքերով, վրացական պատվիրակությունն արդեն վերադարձել է հայրենիք: Բանակցությունների մանրամասների վերաբերյալ Մչեդլիշվիլին նշել է, որ կողմերը մանրամասնորեն քննարկել են Վրաստանի դիրքորոշումը, որը շարունակում է անփոփոխ մնալ.
«Հանդիպման ժամանակ ռուսական կողմը մանրակրկիտ ուսումնասիրել է վրացական կողմի պահանջները` ի պատասխան ԱՀԿ-ին Ռուսաստանի անդամակցության: Մնացած մանրամասները, կողմերի պայմանավորվածության համաձայն, չեն հրապարակվում»:
Երրորդ փուլը տեղի կունենա մայիսի վերջին:
Հիշեցնենք, որ Ռուսաստանը ցանկանում է ԱՀԿ-ին անդամակցել դեռևս 1993 թվականից, ինչին հիմնականում Վրաստանն է խոչընդոտում:
2008 թվականի օգոստոսին տեղի ունեցած ռուս-վրացական հնգօրյա պատերազմից հետո` այս տարվա մարտի 10-ին, Ռուսաստանն ու Վրաստանն առաջին անգամ Շվեյցարիայի Բեռն քաղաքում ԱՀԿ-ին Ռուսաստանի անդամակցության շուրջ նստեցին բանակցությունների սեղանի շուրջ:
Սակայն դա ավարտվեց անարդյունք, քանի որ Ռուսաստանը Վրաստանից պահանջում էր վրացական մաքսային վերահսկողության վերականգնման հարցում բանակցային գործընթաց ձեռնարկել ոչ թե իր, այլ` Աբխազիայի ու Հարավային Օսեթիայի հետ:
