Յուրաքանչյուր տարվա մեջ օրեր են լինում, որ մենք ուզում ենք կուշտ ուտել: Այդ ցանկությանը հատկապես նպաստում են կարճ ցերեկները, անբարենպաստ եղանակը և տոնական սեղանները:
Սակայն նման օրերին պետք է հիշել ոչ միայն քաշի ավելացման և խոլեստերինի մասին, այլև այն մասին, որ ավելորդ յուղոտ սնունդը ազդում է աղեստամոքսային տրակտի միկրոֆլորայի վրա: Հետազոտությունները ցույց են տվել, որ օգտակար և պաթոգեն մանրէների հաշվեկշիռը կարող է խախտվել հօգուտ վերջիններիս:
Շատակերությունը կարող է հանգեցնել աղիների բորբոքման, սակայն հուսահատվել պետք չէ. աղիների միկրոֆլորան կարելի է վերականգնել:
Տոնական սեղաններից առատորեն օգտվողների համար ուրախալի նորություններ կան: Կան մի շարք օգտակար բանջարեղեններ, հատկապես բրյուսելյան կաղամբը: Այն պարունակում է շատ հակամուտագեններ, որոնք կանխում են քաղցկեղը՝ չեզոքացնելով լեկտին տեսակի սպիտակուցը, որը մեծ վնաս է հասցնում օրգանիզմին: Բրյուսելյան կաղամբ պետք է օգտագործել հատկապես մսային կերակուրների հետ:
Սննդաբանները պնդում են, որ նույնիսկ հումակերները, ովքեր հրաժարվում են մսից, ապահովագրված չեն այդ սպիտակուցից, որովհետև դրանք առկա են նաև լոբազգիներում: Ստացվում է, որ բրյուսելյան կաղամբը հարմար է բոլորի համար:
Բժիշկները պնդում են, որ մեկանգամյա շատակերությունը անհանգստության առիթ չպետք է տա, վտանգավոր է մի քանի օր շարունակ շատ ուտելը: Տոնական օրերին հավաքած կիլոգրամներից հետագայում դժվար է լինում ազատվել:
Հետազոտությունները ցույց են տվել, որ չափից շատ ուտելու վնասներից խուսափելու համար շատ օգտակար է նաև ֆիզիկական ակտիվությունը: Այն նպաստում է արյան մեջ շաքարի քանակի կարգավորմանը և ճարպային բջիջներում անբարենպաստ գենետիկ փոփոխությունների կանխմանը:
