Արմավիրի մարզպետ ՀՀԿ-ական Աշոտ Ղահրամանյանն ու նրա օգնական, ՀՀԿ-ական, Արմավիր մարզկենտրոնի ավագանու անդամ Նվեր Պետրոսյանը լծվել են Երևանի ավագանու ընտրությունում ՀՀԿ-ի հաղթանակն ապահովելու «սուրբ» գործին: Սա կլինի յուրօրինակ «մեղայական-փոխհատուցում» փետրվարի 18-ին ՀՀ նախագահի՝ Արմավիրում և Էջմիածնում կրած պարտության դիմաց:
«Հրապարակ»-ը տեղեկություն է ստացել, որ մարզպետ Աշոտ Ղահրամանյանն ու նրա օգնական Նվեր Պետրոսյանը մարզը թողել, հանգրվանել են Երևանում: Երևանի կենտրոնում գրասենյակ են բացել, որտեղ նրանք ամեն օր կազմում-թարմացնում են Արմավիրում բնակվողների երևանցի հարազատների ցուցակները: Արմավիրցի պաշտոնյաները երևանցիների վրա փորձում են ազդել մարզում բնակվող ազգականների միջոցով: Կախված արմավիրցուց՝ մեկին խնդրում են, մեկից պահանջում, մյուսին՝ ակնարկում և այլն:
Թերթի հետ զրույցում Նվեր Պետրոսյանն ասել է, որ ցուցակ չի կազմում, չգիտի՝ մարզպետը ցուցակ ունի, թե չէ, բայց գիտի, որ նա, ՀՀԿ-ական լինելով, մասնակցում է Երևանի ավագանու քարոզչական աշխատանքներին: Ինչպես և ինքը: Երևանում Արմավիրը շտաբ կամ գրասենյակ չունի: Պետրոսյանը գնում է ՀՀԿ կենտրոնական գրասենյակ՝ Մելիք-Ադամյան փողոց: Քարոզչական աշխատանքներին, իր ասելով, մասնակցում է երեկոյան՝ աշխատանքից հետո: Սակայն նրա աշխատավայր՝ Արմավիրի մարզպետարան, մեր կատարած հեռախոսազանգն ապացուցեց հակառակը: «Նվեր Պետրոսյանն այստեղ չի լինում, առավոտյան գալիս և արագ դուրս է գալիս»,- պատասխանեց կնոջ ձայնը: Ու հիմա կարելի է ենթադրել, թե էլ ինչ կա, որ այնպես չի ներկայացնում Նվեր Պետրոսյանը:
«Արդարության համար նշենք, որ Երևանի ավագանու ընտրություններին մասնակցում են ոչ միայն Արմավիրի մարզպետն ու իր օգնականը, այլև Արագածոտնի, Տավուշի, Սյունիքի մարզպետները: Բնականաբար, բոլորը հանրապետականներ են և աշխատում են ՀՀԿ-ի համար»,- գրում է թերթը:
