«Ժողովուրդ»-ի խմբագրականում կարդում ենք. «Հատկապես վերընտրությունից հետո Սերժ Սարգսյանին սկսեցին քննադատել կադրային լուրջ փոփոխություններ կատարելու անկարողության համար: Սակայն իրականում նախագահական ընտրություններից հետո Ս. Սարգսյանը կատարել է առնվազն մեկ էական կադրային փոփոխություն. իր փեսային` Միքայել Մինասյանին, նշանակել է Վատիկանում դեսպան: Կարծում ենք, Հայաստանում քիչ մարդիկ կան, ովքեր տեղեկացված չեն Մինասյանի ունեցած լրջագույն ազդեցության մասին ինչպես Ս. Սարգսյանի կայացրած որոշումների, այնպես էլ երկրի մեդիադաշտի վրա: Հետևաբար` նման կարևորության ֆիգուրին երկրից դուրս դեսպան ուղարկելը չէր կարող չունենալ լուրջ դրդապատճառներ: Թե ինչպիսիք են դրանք իրականում` ցույց կտա ժամանակը:
Այս պահին, սակայն, շրջանառվում է երկու տարբերակ, որոնցից առաջինի համաձայն՝ Ս. Սարգսյանն իր փեսային ուղարկել է «պատվավոր աքսորի», քանի որ նախագահական ընտրություններում Մինասյանի տրամադրած սոցհարցումների ու խոստումների վրա հենվելով՝ Ս. Սարգսյանը իրեն չափից ավելի հանգիստ էր զգացել և անգամ հրահանգել էր ՀՀԿ-ականներին ընտրություններին մասնակից չդարձնել թաղային հեղինակություններին և շատ ընտրակաշառք չբաժանել: Սակայն ինչպես տեսանք, նա մի կերպ կարողացավ վերարտադրվել:
Բացի այդ, Ս. Սարգսյանին վրդովվեցրել է այն, որ հետընտրական շրջանում, երբ հանրային ատելության սլաքն ուղղված էր իր դեմ, Միքայել Մինասյանի «դաբրոյով» պատգամավորական մանդատներ ստացած «օսլայած մազերով» ջահելներից որևէ մեկը հրապարակավ չպաշտպանեց իրեն: Ս. Սարգսյանն անգամ իր դժգոհությունը հրապարակավ հայտնել է ՀՀԿ ԳՄ նիստերից մեկի ընթացքում`Սամվել Ֆարմանյանին կշտամբելով, թե մանդատները նվեր ստացած որոշ ջահելների թվում է` իրենք «սանատորիա են եկել»: Դրա հաջորդ օրն իսկ Ֆարմանյանը շտապեց հարցազրույց տալ և գովերգել Ս.Սարգսյանին:
Մինասյանից հիասթափված լինելու տարբերակի օգտին է խոսում նաև այն դեմարշը, որը վերջին օրերին սկսվել է նրա թիմի կարկառուն անդամների դեմ. աշխատանքից ազատվեց «Հյուսիս-Հարավ ավտոճանապարհային միջանցք» ՊՈԱԿ-ի գլխավոր տնօրեն Արա Հովսեփյանը, սկանդալային պատմություններ սկսեցին զարգանալ ԱԺ պատգամավոր Նաիրա Կարապետյանի շուրջ, նախօրեին էլ հայտնի դարձավ, որ Մինասյանի մերձավորներից Աժ պատգամավոր Լևոն Մարտիրոսյանի անունն է կապվում պետական բյուջեից 500 միլիոն դրամի հասնող գրանտակերության պատմության հետ:
Սակայն քաղաքական զարգացումներին առավել ուշադիր հետևողներն այս ամենի հետևում հակված են տեսնել այլ` շատ ավելի խորքային սցենար, ըստ որի՝ Մինասյանը ժամանակավորապես հեռացվել է ՀՀ քաղաքական թատերաբեմից, որպեսզի նրա նկատմամբ առկա բացասական վերաբերմունքը մեղմվի, և նա 2018-ի նախագահական ընտրություններից մեկ տարի առաջ վերադառնա` արդեն մաքրված իմիջով»:
