Սահմանադրական փոփոխությունների հանրաքվեն այլևս անցյալում է: Եթե մի շարք դիտորդական կազմակերպություններ ու մայր օրենքի փոփոխությանը դեմ քաղաքական, հասարակական գործիչներ, իրավաբաններ մինչ դեկտեմբերի 6-ը արդեն արձանագրում էին ընտրախախտումներ, մասնավորապես խոսվում էր, ապա հանրաքվեի ողջ ընթացքում ու դրանից հետո այդ խախտումները ոչ միայն հաստատվեցին գործնականում, այլև կրկնապատկվեցին ու ավելացան նախորդ ընտրություններում նմանը չունեցող նոր ու մշակված խախտումներով:
Հանրաքվեի ողջ ընթացքն ուղեկցվեց արդեն հին ու հայտնի ընտրակաշառքներով ու կրկնաքվեարկություններով և արդեն նոր, բայց սպասելի կրկնաքվեարկություններով նույնականացման քարտերի ու լրացուցիչ ցուցակների միջոցով, այդ ամենի հետ մեկտեղ ընտրակեղծարարները չմոռացան կիրառել անվերահսկելի ու մշակված «կարուսելի» մեխանիզմը:
Տեսախցիկները ֆիքսում էին, իսկ հանձնաժողովի անդամներն ու իրենց գործի ու հատկապես կուսակցության նվիրյալ հանձնաժողովի անդամներն ու նախագահները հերքում անհերքելին:
Առավոտյան արդեն պատկերը հստակ էր՝ մոտ 825 հազար «այո», 420 հազար «ոչ»: Ընդդիմադիրներն ու դիտորդական առաքելություն իրականացնող կազմակերպությունները փաստում են՝ ամենախայտառակ ընտրությունները երբևէ: Մեկ գիշերվա ընթացքում, մեկ հոգու թեթև ձեռքով նկարվեց քաղաքացիների ընտրության հակառակ պատկերը:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցի համար մեծաքանակ ընտրախախտումների առկայությունը սպասելի էր, սակայն նախորդ ընտրությունների համեմատ կային անակնկալներ:
Մի շարք լրագրողների ու դիտորդների արձանագրած անհերքելի ընտրախախտումների վերաբերյալ ԿԸՀ արդեն ներկայացվել են բազմաթիվ բողոքներ: Եթե նախորդ ընտրություններում արձանագրված կեղծիքների հիման վրա հարուցված քրեական գործերը որոշ ժամանակ անց ուղղակի կարճվել են, ապա այս անգամ հաջողվել է արձանագրել այնպիսի փաստեր, որոնք վկայում են խախտումների ոչ միայն համատարած, այլև համակարգված բնույթի մասին, նշում է փաստաբան Տիգրան Եգորյանը:
Եգորյանը պատմում է՝ անգամ իր գործընկեր փաստաբաններից ոմանք չեն հասցրել իրենք իրենց տեղը քվեարկել, ընտրացուցակներում իրենց փոխարեն արդեն քվեարկել էին:
