ՀՀ տարածքային կառավարման եւ արտակարգ իրավիճակների նախարարությունում դեկտեմբերի 4-ին` ժամը 11.50-ին, ահազանգ է ստացվել, որ Վանաձոր-Ալավերդի ավտոճանապարհին` «Ջաղացներ» կոչվող վայրի մոտակայքում, տեղի է ունեցել ՃՏՊ. «Մերսեդես Վիտո» մակնիշի ավտոմեքենան դուրս է եկել ճանապարհի երթևեկելի հատվածից և ընկել ձորը. կան տուժածներ. անհրաժեշտ է փրկարարների օգնությունը: Ինչպես տեղեկացրին ՀՀ տարածքային կառավարման եւ արտակարգ իրավիճակների նախարարությունից, դեպքի վայր է մեկնել մեկ մարտական հաշվարկ:
Պարզվել է, որ դեռևս չբացահայտված հանգամանքներում Մ-6 ավտոճանապարհի Վանաձոր-Ալավերդի 22-րդ կմ-ին «Մերսեդես Վիտո» մակնիշի EXE288 վրացական պետհամարանիշի ավտոմեքենան (վարորդ՝ Ռ. Գ., Վրաստանի Հանրապետության քաղաքացի, ծնված 1961թ.) դուրս է եկել ճանապարհի երթևեկելի հատվածից և գլորվել մոտ 8 մետր խորությամբ ձորը:
Մինչև հրշեջ-փրկարարների դեպքի վայր հասնելը 7 ուղևորները տեղի ուժերով դուրս են բերվել ավտոմեքենայից: Երեք տուժածներից մեկը՝ 1989թ. ծնված Մ. Դ.-ը (Ռումինիայի Հանրապետության քաղաքացի) շտապօգնության աշխատակիցների կողմից ստացել է առաջին բուժօգնություն, իսկ մյուս 2 տուժածները` 1972թ. ծնված Բ. Բ.-ը և 1956թ. ծնված Կ. Շ.-ը հոսպիտալացվել են Վանաձորի բժշկական կենտրոն, որտեղ տուժածների առողջական վիճակը բժիշկները գնահատել են միջին ծանրության:
Հրշեջ-փրկարարները հոսանքազրկել են ավտոմեքենան:
