«Առաջին լրատվական»-ի զրուցակիցն է «Նոր ժամանակներ» կուսակցության առաջնորդ Արամ Կարապետյանը
– Անցած շաբաթ Վրաստանի խորհրդարանը որոշում ընդունեց` դադարեցնել Վրաստանի տարածքով ռուսական ռազմամթերքի և անձնակազմի փոխադրումը կարգավորող համաձայնագիրը: Այդ որոշումից մեկ օր առաջ Հայաստանում էր Վրաստանի պաշտպանության նախարարը, երեկ Հայաստան էր ժամանել արտգործնախարարը: Ձեր կարծիքով, ինչո՞վ է պայմանավորված Վրաստանի այդ քայլը և ինչո՞ւ են ակտիվացել վրացի պաշտոնյաների այցերը Հայաստան:
– Վատ միտում եմ տեսնում ռազմական տրանզիտը փակելու մեջ, քանզի շատ հնարավոր է, որ վաղը ինչ-ինչ հանգամանքներից ելնելով հացի ճանապարհն էլ փակեն: Եթե մեկ անգամ փակելն այդքան նորմալ անցավ, ապա երկրորդ անգամ էլ կկրկնեն: Ես կարծում եմ, որ Վրաստանը հասկանում է, որ լավ բան չի արել, և վրաց պաշտոնյաների այցերը նպատակ ունեն մեղմելու ստեղծված իրավիճակը, քանզի մենք` որպես ՀՀ քաղաքացիներ, հստակ հասկանում ենք, որ ղարաբաղյան հարցում գնալով իրավիճակը սրվում է, և այս պարագայում վրացական կողմի նման քայլը ուղղակիորեն հակահայկական դրսևորում ունի: Վերջիվերջո այդ ճանապարհը միայն ռուսական ռազմաբազայի համար չէր, չէ՞ որ հայ-ռուսական պայմանագրում նաև նշված էր, որ Ռուսաստանը նաև պատրաստվում է արդիականացնել Հայաստանի զինված ուժերը` սրա մասին իշխանությունները չեն ուզում խոսել: Ես կարծում եմ, որ հենց մենք հաստատեցինք հայ-ռուսական պայմանագիրը, ամերիկացիները մեզ պատասխանեցին Վրաստանով:
– Այս իրավիճակում ինչպիսի՞ն կլինի Թուրքիայի դերակատարությունը` հաշվի առնելով այն, որ խոսվում է ռուսական ռազմական տեխնիկան Թուրքիայի տարածքով Հայաստան հասցնելու մասին, օրերս էլ տեղեկատվություն տարածվեց, թե ԱՍԱԼԱ-ն Վրաստանում Թուրքիայի դեսպանատուն սպառնալից նամակ է ուղարկել, որ եթե Թուրքիան չճանաչի Հայոց ցեղասպանությունը, ահաբեկչություն կլինի:
– Հիմա ամեն ինչ արվում է, անգամ ստիպում են, որպեսզի Ռուսաստանը ստիպված լինի Թուրքիայի միջոցով այդ փոխադրումները կատարել: Այսինքն` այսպես թե այնպես, աշխարհը մեզ թելադրում է անգամ նախապայմանների պարագայում հայ-թուրքական սահմանների բացում: Ես կարծում եմ, որ սա դառնալու է քննարկման թեմա ապագա ընտրությունների ընթացքում, քանզի սա շատ լուրջ հարց է և ինչ-որ ձևով ազդելու է նաև Վրաստանի ներքաղաքական իրավիճակի վրա: Երեկվանից Ռուսաստանում սկսվել է վրացական շատ լուրջ կուսակցությունների մի հավաք, որը տևելու է երկու օր:
– Պարոն Կարապետյան, Մոսկվայում ստեղծվել է ջավախահայերի նոր միավորում, և գաղտնիք չէ, որ Ռուսաստանը երբ ցանկացել է ճնշումներ գործադրել Վրաստանի վրա, բարձրացրել է Ջավախքի հարցը: Ձեր կարծիքով, այս իրավիճակում Ռուսաստանը կշահարկի՞ այդ խնդիրը:
– Չեմ կարծում, որ դա պետք է օգտագործել, ավելին` այս պահին անհրաժեշտ չէ խոսել այդ խնդրի մասին:
– Վրացական կողմը, վրաց փորձագետները վստահեցնում են, որ հայկական կողմը նախապես տեղյակ էր, որ Վրաստանի խորհրդարանը որոշելու է փակել Ռուսաստանի ռազմական տրանզիտը: Ինչպե՞ս կմեկնաբանեք այս հանգամանքը:
– Ճիշտ են ասում: Քաղաքական դաշտում իրարամերժ խոստումներ տալը շատ վատ է ավարտվում, իսկ Սերժ Սարգսյանն իրարամերժ խոստումներ էր տվել` մեկին խոստացել էր, որ ռուսական ռազմաբազաների տեղակայման ժամկետը չի երկարացնի, մյուսին խոստացել էր, որ կերկարացնի, երրորդին ասել էր, որ ընդհանրապես կհարժարվի դրանցից, և այժմ եկավ մի պահ, երբ այդ ամենը համընկավ: Եվ Սերժ Սարգսյանը, հասկանալով, որ ամերիկացիները Վրաստանի միջոցով պատասխան քայլ են անելու, ուղղակիորեն բաց թողեց այդ քայլը: Իր պայմանավորվածությունը հենց դա էր` լռենք, թող անեն իրենց ուզածը: Իսկ Վրաստանն այժմ մեծ PR է անում` ամեն անգամ որևէ նախարարի ուղարկելով ցույց է տալիս, որ Հայաստանի հետ խնդիր չունի, որ եղբայրական հարաբերություններ են հաստատված, և ՀՀ իշխանությունները տեղյակ են իրենց քայլերից, որպեսզի Վրաստանում չբարձրացնի հենց նույն ջավախահայության խնդիրը: Բայց կարծում եմ, որ Սաակաշվիլին սխալ է հաշվում, ինքը զարգացումների է սպասում մի տեղում, որտեղ դա չի լինելու և լինելու է այլ տեղում` սա պատասխան է ունենալու:
