«ԵՄ-ն Թուրքիային քաղցրաբլիթ շպրտեց այն ժամանակ, երբ որ Թուրքիան որևէ դրական դերակատարում չուներ տարածաշրջանում ինչ- որ չափով խաղաղությանը նպաստելու գործում,- «Առաջին լրատվական»-ի հետ զրույցում նշեց ԱԺ Ժառանգություն խմբակցության քարտուղար Թևան Պողոսյանը՝ անդրադառնալով նոյեմբերի 29-ին Բրյուսելում տեղի ունեցած ԵՄ-Թուրքիա գագաթաժողովին:
Թևան Պողոսյանի դիտարկմամբ՝ գաղտնիք չէ Թուրքիայի բացասական դերակատարումը ահաբեկչության դեմ պայքարում. «Թուրքիան ասում է, որ ինքն էլ է մասնակցում այդ պայքարին, բայց միաժամանակ նպաստում է և՛ ԻՊ-ին ֆինասական աջակցությամբ, և՛ իր սահմանները թափանցիկ պահելով, և շատուշատ փախստականներ են անցնում, այդ թվում նաև ահաբեկիչները: Գաղտնիք չէ նաև այն, որ 120 երկրներից ԻՊ զինակիցներ են գալիս Թուրքիա և այնտեղից են տեղափոխվում Սիրիա և անցնում ԴԱԻՇ-ի շարքեր:
ԵՄ- Թուրքիա գագաթնաժողովում պետք է այս հարցերը քննարկվեին, բայց մենք լսում ենք նրանց որոշումների մասին առ այն, որ Թուրքիային տրամադրվում է 3 միլիարդ եվրո՝ փախստականերին Թուրքիայում՝ ճամբարներում պահելու համար: Բացի դրանից՝ ԵՄ-Թուրքիա բանակցությունները ավելի հաճախակի կլինեն, մեկ անգամի փոխարեն երկու անգամ գագաթնաժողով կհրավիրվի: Թուրքիային նաև տրվել է առանց վիզային ռեժիմի ճանապարհորդել դեպի Եվրոպա»:
Թևան Պողոսյանի խոսքով՝ փոխանակ բացատրեն, որ պետք է այլ քաղաքականություն վարել, քաղցրաբլիթ են շպրտում՝ ասելով՝ դրանով քո ուշադրությունն ուզում ենք հրավիրել, որ ուշադիր լինես մեր հրամաններին: Այս ամենը ոչ բարենպաստ ուղղությամբ կզարգանա, եթե ի վերջո ԵՄ-ն չփորձի պայմաններ առաջ քաշել Թուրքիայի քաղաքականությունը փոխելու ուղղությամբ:
«Ոչ միայն մեր պատմության, այլ նաև այս վերջին 2 շաբաթների ընթացքում մենք հասկացանք, որ Թուրքիան ճանաչում է միայն մեկ լեզու՝ ճնշումների լեզուն»,- նշեց Թ. Պողոսյանը հավելելով. «Թուրքիան ստանալով այս քաղցրաբլիթը՝ հնարավորությունը՝ կփորձի ԵՄ հետ հարաբերություններում ավելի մերձեցման գնալ, մենք բոլորս գիտենք, որ թուրքը թուրք է մնում: Թուրքիան, ունենալով այս հնարավորությունը, իր վարքագիծը չի փոխելու»:
Մանրամասները՝ տեսանյութում:
