Ուկրաինայում Հայաստանի դեսպան Անդրանիկ Մանուկյանը կրկին հայտնվել է մամուլի ուշադրության կենտրոնում՝ այս անգամ կոռուպցիոն սկանդալի կիզակետում։
Ուկրաինական СorruptUA պարբերականի հրապարակման համաձայն՝ Ուկրաինայի նախկին նախագահ Վիկտոր Յանուկովիչի մտերիմ ընկերոջ՝ նրա իշխանության օրոք Անտառային ռեսուրսների գործակալությունը ղեկավարած Վիկտոր Սիվեցի շքեղ առանձնատունը դարձել է Հայաստանի դեսպան Անդրանիկ Մանուկյանի նստավայրը:
Պարբերականն ընդգծում է, որ առանձնատունն արժե մոտ 2․5 միլիոն դոլար և ոչ մի խոսք չկա այն մասին, որ այն Մանուկյանին վարձով է տրվել։
Ուկրաինական լրատվամիջոցը փաստում է՝ առանձնատան սեփականատերը Մարինա Ժուրավլյովան է՝ Վիկտոր Սիվեցի կինը։ Սիվեցի ողջ ունեցվածքը գրանցված է կնոջ անունով: Դիվանագիտական հարաբերությունների մասին Վիեննայի կոնվենցիայի համաձայն՝ դեսպանի նստավայրը, ինչպես նաև դեսպանության տարածքն անձեռնմխելի են, հետևաբար՝ Յանուկովիչի դաշնակից և դեռևս ուկրաինական իրավապահների ուշադրության կենտրոնում գտնվով Սիվեցը այդկերպ իրեն պաշտպանում է իրավապահների խուզարկությունից:
Միջազգային անվտանգության հարցերով հայկական ինստիտուտի հիմնադիր Ստյոպա Սաֆարյանն անդրադառնալով կոռուցպիոն սկանդալին՝ նշեց, թե ցավում է, որ Հայաստանի Հանրապետությունն ու արտաքին գործերի նախարարությունն այդքան անփույթ են վերաբերվում հայ-ուկրաինական հարբերություններին: Փորձագետն ընդգծեց՝ պաշտոնավարումից ի վեր չի հիշում մի դեպք, երբ Ուկրաինայում Հայաստանի դեսպանն աչքի ընկած լինի որևէ դրական գործունեությամբ:
Սաֆարյանի կարծիքով՝ Հայաստանի արտաքին գործերի նախարարությունը հազիվ թե տեղյակ լինի Մանուկյանի այս քայլից:
Նշենք, որ Ուկրաինայում Հայաստանի դեսպան Անդրանիկ Մանուկյանը այսօր«Ազատության» հետ զրույցում հայտարարել է, որ հեռանում է Կիևում Միչուրինի թիվ 31 հասցեում գտնվով շքեղ առանձնատնից, դրա շուրջ ծագած կոռուպցիոն սկանդալի պատճառով:
