Թուրքական Son dakika լրատվական կայքի փոխանցմամբ՝ երեկ Թուրքիայի խորհրդարանում տեղի է ունեցել նորընտիր պատգամավորների երդմնակալության արարողությունը։ 26-րդ գումարման խորհրդարանի անդամների երդմնակալության արարողությունը տևել է 9 ժամ։
Հունիսի 7-ի խորհրդարանական ընտրությունների համեմատ՝ Թուրքիայի խորհրդարանի շենքում իրենց տեղերով փոխանակվել են քրդամետ «Ժողովուրդների դեմոկրատական» կուսակցությունը (ԺԴԿ) և «Ազգայնական շարժում» կուսակցությունը (ԱՇԿ)։ Բանն այն է, որ հունիսի 7-ի ընտրությունների արդյունքներով ԱՇԿ-ն ու ԺԴԿ-ն խորհրդարանում ստացել էին պատգամավորական 80-ական մանդատ, բայց քանի որ ԱՇԿ-ն ԺԴԿ-ի համեմատ հավաքել էր մոտ 1.5 միլիոն քվե ավելի, նա ճանաչվել էր 3-րդը և համապատասխան տեղ էր զբաղեցրել խորհրդարանի նիստերի դահլիճում։
Նոյեմբերի 1-ի ընտրությունների արդյունքներով՝ ԱՇԿ-ն ստացել է միայն 40 պատգամավորական տեղ (կրկնակի քիչ), իսկ ԺԴԿ-ն՝ 59 պատգամավորական տեղ, որով և նա դարձել է Թուրքիայի խորհրդարանում ներկայացված երրորդ խոշոր ուժը և խորհրդարանում զբաղեցրել է հունիսի 7-ից հետո ԱՇԿ-ի (3-րդ ուժի) տեղը, իսկ ԱՇԿ-ի պատգամավորներն այս անգամ նստել են ԺԴԿ-ի (4-րդ ուժի) պատգամավորների տեղը։
Տեսախցիկները որսացել են, թե ինչպես է Բահչելին նայում խորհրդարանի չորրորդ ուժի համար նախատեսված՝ ԱՇԿ-ի նախկին տեղին, որն այժմ զբաղեցրել է ԺԴԿ-ն։
Հիշեցնենք, որ հունիսի 7-ի ընտրությունների արդյունքներով ԱՇԿ-ն հաղթել էր միայն մեկ նահանգում՝ Օսմանիեում, որտեղից սերում է Բահչելին, սակայն նոյեմբերի 1-ին տանուլ է տվել անգամ այդ նահանգում։ Եթե ԱՇԿ-ն հունիսի 7-ի ընտրությունների արդյունքներով պատգամավորական մանդատ չի կարողացել ստանալ 34 նահանգում, ապա նոյեմբերի 1-ին այդպիսի նահանգների թիվը հասել է 57-ի։
ԱՇԿ-ն քվեների քանակական անկում է գրանցել Թուրքիայի 81 նահանգից 80-ում, և միայն Արդահանի նահանգում են ավելացել նրա քվեները։ ԱՇԿ-ն այս անգամ ստացել է 1.8 միլիոն քվե պակաս։ Նոյեմբերի 1-ի ընտրությունները հանգեցրել են նաև նրան, որ ԱՇԿ-ն զրկվել է Թուրքիայի խորհրդարանի փոխնախագահի պաշտոնից։
Թուրքիայի խորհրդարանն ունի 4 փոխնախագահ, որոնք բաժին են ընկնում խորհրդարանում ամենաշատ ներկայացված ուժերին։ Եթե խորհրդարան անցած ուժերից մեկը ստանում է պատգամավորական մանդատների կեսից ավելին, ապա փոխնախագահի 4 պաշտոններից երկուսը բաժին են ընկնում հենց նրան, իսկ մնացյալ երկուսը՝ 2-րդ և 3-րդ տեղը զբաղեցրած կուսակցություններին։
Այժմ խորհրդարանի փոխնախագահի պաշտոններից 2-ը բաժին են ընկել ԱԶԿ-ին, մեկական փոխնախագահ կունենան ԺՀԿ-ն ու ԺԴԿ-ն (մինչդեռ հունիսի 7-ի ընտրություններից հետո խորհրդարան մուտք գործած նույն չորս ուժերն ունեին մեկական փոխնախագահ)։
