Իրանի մայրաքաղաքում բացված արագ սննդի KFC ռեստորանը ոստիկանության կողմից փակվել է աշխատանքի երկրորդ օրը՝ հաղորդում է BBC News-ը:
KFC Հալյալ ռեստորանը, որն անվանել են նման տեսակի «առաջին ամերիկյան մասնաճյուղ», բացել են երկրի արդյունաբերության և առևտրի նախարարության կողմից հավանություն ստանալուց հետո: Սակայն երեքշաբթի օրը այն փակվել է:
Տեղի ԶԼՄ-ները դրա պատճառը համարել են ցանցի ամերիկյան ծագումը, ինչն իշխանությունների կողմից գնահատվել է որպես Իրանի մշակույթի վրա ամերիկյան ազդեցություն:
Խանութի մենեջեր Աբաս Պազուկին բացատրել է, որ KFC Հալյալը թյուրիմացաբար է փակվել՝ հավելելով, որ այն ամերիկյան KFC-ի մրցակիցն է, որը տարածված է Թուրքիայում:
Սակայն ԱՄՆ-ում ցանցի ներկայացուցիչները զարմացած էին Իրանում մասնաճյուղի բացմամբ:
«Իրանին մենք դրա իրավունքը չենք տվել: Մենք կապի մեջ ենք տեղի իշխանությունների հետ և դատական հայց կներկայացնենք անձանց դեմ, ովքեր պնդում են, թե KFC-ի բացման իրավունք ունեն»,- ասել է ցանցի ներկայացուցիչ Լորի Շալոուն:
