Այսօր մտավոր սեփականության համաշխարհային օրվան նվիրված կլոր սեղանի քննարկմանը ՄԱԿ-ի հայաստանյան գրասենյակի հանրային տեղեկատվության վարչության ներկայացուցիչ Մարիա Դոցենկոն նկատեց, որ հեղինակային իրավունքներին և այլ հարցերին առնչվող օրենքները պաշտպանում են հեղինակների, դերասանների, հեռարձակողների իրավունքները: Դա իր ներդրումն ունի ազգի մշակույթի զարգացման գործում: Նրա խոսքերով, չնայած Հայաստանի օրենքը լիովին համապատասխանում է եվրոպական չափանիշներին, սակայն դեռ շատ անելիքներ կան այս բնագավառում:
Ի դեպ, կլոր սեղանի այդ քննարկմանը հրավիրված էր նաև մշակույթի նախարար Հասմիկ Պողոսյանը, սակյան նրա փոխարեն ներկայացել էր փոխնախարար Արթուր Պողոսյանը: Նա նշեց, որ առաջին հայացքից տպավորություն է ստեղծվում, թե այս խնդիրների պատասխանատուն մշակույթի նախարարությունն է, քանի որ նա է առնչվում մտավոր սեփականատերերի հետ, ապա մեջ բերեց Դոնեցկու այն դիտարկումը, որ ՀՀ օրենքը լիակատար է այս առումով, և ավելացրեց. «Մեր ամենօրյա աշխատանքը հեղինակային իրավունքիների և մտավոր սեփականության բազմօրինակ խախտումներ է արձանագրում, բայց օրենքի կիրառության առումով մենք շատ քիչ պատասխանատվություն ունենք»: Պողոսյանի խոսքերով, մտավոր սեփականության խախտման առումով առաջինը իր իրավունքները պետք է պաշտպանի հայ հեղինակը:
Ի դեպ, Մարիա Դոցենկոն մեկ րոպե լռությամբ հարգեց Չեռնոբիլի զոհերի հիշատակը և նկատեց, որ ՀՀ 350 քաղաքացի է զոհվել այնտեղ, ապա հիշեցրեց Ճապոնիայում տեղի ունեցող աղետները և ասաց, որ այս առումով լուրջ մտահոգություն ունենք, քանի որ Հայաստանում կա և գործում է Մեծամորի ատոմակայանը:
