Վիեննայում Սիրիայում իրավիճակի հարցով հանդիպած 19 երկրների ԱԳՆ ղեկավարները պայմանավորվել են Սիրիայում անցումային կառավարություն ստեղծելու վերաբերյալ: BBC-ի ռուսական ծառայության հաղորդմամբ՝ Սիրիայի հարցով ՄԱԿ-ի հատուկ հանձնակատար Ստեֆան դե Միստուրայի ներկայացրած՝ հանդիպման վերջնական կոմյունիկեում 9 կետ կա:
Հումանիտար օգնություն հասցնելու հնարավորությունը պետք է ապահովվի Սիրիայի ամբողջ տարածքում: ԴԱԻՇ-ը և ՄԱԿ-ի ծայրահեղական կազմակերպությունների ցուցակից այլ կազմակերպություններ պետք է ոչնչացվեն: Սիրիայում պետք է պահպանվի միասնական աշխարհիկ պետություն իր բոլոր ինստիտուտներով: Հակամարտության դադարեցմանն ուղղված դիվանագիտական ջանքերը կինտենսիվացվեն: Սիրիայի հարցով միջազգային հանդիպում կանցկացվի Բաշար Ասադի և կառավարության ու ընդդիմության ներկայացուցիչների մասնակցությամբ:
Հայտարարության մեջ ասվում է, որ հանդիպման արդյունքը պետք է լինի նոր անցումային կառավարության ձևավորումը, որը կներկայացնի ողջ ժողովրդի շահերը, որը երկիրը կղեկավարի մինչև հաջորդ ընտրություններ, որոնցից հետո երկիրը նոր սահմանադրություն կունենա: Քաղաքական կարգավորման գործընթացը սիրիացի ժողովուրդը կիրականացնի: Սիրիայի ժողովուրդը կորոշի նրա ճակատագիրը: Կարգավորման գործընթացի մասնակից երկրները ջանքեր կգործադրեն երկրի ամբողջ տարածքում զինադադարի ապահովման համար: ԴԱԻՇ-ի հետ զինադադար չի կնքվի:
Հանդիպումից հետո ԱՄՆ պետքարոտւղար Ջոն Քերին հայտարարել է, որ Մոսկվայի և Վաշինգտոնի դիրքորոշումները Բաշար Ասադի ապագայի հարցում նորից տարբեր են: Ռուսաստանի ԱԳՆ ղեկավար Սերգեյ Լավրովի խոսքով՝ Ասադի ճակատագիրը պետք է որոշի սիրիացի ժողովուրդը:
Բանակցություններին մասնակցել են ՄԱԿ-ի, ԵՄ-ի, Ռուսաստանի, ԱՄՆ-ի, Գերմանիայի, Ֆրանսիայի, Սաուդյան Արաբիայի, Թուրքիայի, Իրանի, ԱՄԷ-ի, Կատարի, Հորդանանի, Եգիպտոսի, Իտալիայի, Մեծ Բրիտանիայի, Իրաքի և Լիբանանի պատվիրակությունները: Հաջորդ հանդիպումը տեղի կունենա 2 շաբաթ հետո:
